ٹیسلا بھارت کے قریب؟ مودی-مسک کی ٹیک ملاقات
وزیراعظم نریندر مودی اور امریکی ٹیکنالوجی کے ماہر ایلون مسک کے درمیان ٹیلیفون پر ایک اہم گفتگو ہوئی جس میں ٹیکنالوجی، اختراع (انوویشن) اور بھارت میں کاروباری مواقع جیسے موضوعات پر بات چیت ہوئی۔
ایلون مسک کی کمپنی اسٹارلنک بھارت میں سیٹلائٹ انٹرنیٹ خدمات شروع کرنے کی کوشش کر رہی ہے، جس کے لیے حکومت کی منظوری کا انتظار کیا جا رہا ہے۔ اسٹارلنک پہلے ہی بھارتی کمپنیوں بھارتی ایئرٹیل اور ریلائنس جیو کے ساتھ شراکت داری کا اعلان کر چکی ہے تاکہ اپنے سیٹلائٹ آلات اور خدمات کو فروغ دے سکے۔
اسٹارلنک کے اعلیٰ عہدیداران نے حال ہی میں مرکزی وزیر پیوش گوئل سے ملاقات بھی کی، لیکن کمپنی کو ملک میں سروس شروع کرنے کے لیے ضروری ضوابط پر عمل نہ کرنے کی وجہ سے اب تک اجازت نہیں ملی۔
دوسری جانب، ایلون مسک کی الیکٹرک کار کمپنی ٹیسلا بھی بھارت میں داخلے کے لیے تیار نظر آتی ہے۔ حالیہ دنوں میں کمپنی نے بھارت میں مختلف عہدوں کے لیے بھرتیاں شروع کی ہیں۔ تاہم، ماضی میں ٹیسلا کی راہ میں سب سے بڑی رکاوٹ بھارت کی درآمدی ڈیوٹی رہی ہے۔ حکومت نے اب "الیکٹرک مسافر گاڑیاں” اسکیم کا اعلان کیا ہے جس میں درآمدی ڈیوٹی میں نرمی کی گئی ہے، بشرطیکہ کمپنیاں بھارت میں مقامی مینوفیکچرنگ یونٹ قائم کریں۔
حکومت کی نئی پالیسیوں اور وزیراعظم کی دلچسپی سے ایسا محسوس ہو رہا ہے کہ جلد ہی بھارت میں اسٹارلنک اور ٹیسلا کی خدمات دستیاب ہوں گی، جو کہ ڈیجیٹل بھارت کے خواب کو مزید مضبوط کریں گی۔
