ایلون مسک کا بڑا اعلان: ایکس پر ہر آواز کو ملے گا برابر کا موقع

سابق امریکی صدر ڈونلڈ ٹرمپ کے مشیر پیٹر نیوارو نے ایک بار پھر بھارت پر الزام لگایا کہ وہ روسی تیل خرید کر صرف منافع کما رہا ہے اور اس سے یوکرین جنگ کو سہارا مل رہا ہے۔ تاہم سوشل میڈیا پلیٹ فارم ایکس نے ان کے اس مؤقف کو جھوٹا اور متضاد قرار دے کر فیکٹ چیک جاری کیا۔

ایلان ماسک نے اس معاملے پر ردعمل دیتے ہوئے کہا کہ ’’اس پلیٹ فارم پر لوگ خود فیصلہ کرتے ہیں، تمام پہلو سامنے آتے ہیں اور کمیونٹی نوٹس سب کی غلطیاں درست کرتا ہے، بغیر کسی استثنا کے۔‘‘ ماسک نے براہِ راست نیوارو کا نام نہیں لیا مگر یہ واضح کیا کہ فیکٹ چیک سب پر یکساں طور پر لاگو ہوتا ہے۔

ایک فیکٹ چیک نوٹ میں کہا گیا کہ بھارت روسی تیل اپنی توانائی کی ضروریات پوری کرنے کے لیے خرید رہا ہے اور یہ کسی عالمی قانون یا پابندی کی خلاف ورزی نہیں ہے۔ مزید کہا گیا کہ امریکہ خود روسی مصنوعات مثلاً یورینیم درآمد کر رہا ہے، جس سے دوہرا معیار ظاہر ہوتا ہے۔

یاد رہے کہ نیوارو پہلے بھی بھارت پر کڑی تنقید کر چکے ہیں۔ انہوں نے بھارت پر ’’منافع خوری‘‘ اور ’’کریملن کے لیے لانڈری مشین‘‘ جیسے الزامات لگائے تھے۔ یہاں تک کہ انہوں نے بھارت کے خلاف ذات پات پر مبنی الفاظ بھی استعمال کیے۔

بھارت اور امریکہ کے درمیان تجارتی کشیدگی اس وقت بڑھی جب امریکہ نے بھارتی برآمدات پر اضافی محصولات لگا دیے۔ تاہم دونوں ملکوں کے رہنماؤں نے تعلقات کو بہتر بنانے کے عزم کا اظہار کیا ہے۔