یوکرین پر روسی حملہ، F-16 پائلٹ شہید، زیلنسکی کا پیٹریاٹ میزائل کا مطالبہ
یوکرین نے اپنے بہادر ایف-16 پائلٹ لیفٹیننٹ کرنل میکسم اوستیمنکو کو خراجِ عقیدت پیش کیا، جو روس کے اب تک کے سب سے بڑے فضائی حملے کو روکنے کی کوشش میں شہید ہو گئے۔
ریاستی میڈیا کے مطابق، اوستیمنکو نے حملے کے دوران سات ڈرون اور میزائل تباہ کیے، تاہم اُن کا طیارہ شدید نقصان کے باعث گرنے لگا۔ انہوں نے جہاز کو رہائشی علاقے سے دور لے جا کر زمین سے ٹکرایا تاکہ شہریوں کی جانیں بچائی جا سکیں، لیکن خود کو نکالنے کا وقت نہ مل سکا۔
یہ حملہ گزشتہ تین برسوں میں ایک ہی رات میں سب سے بڑا ثابت ہوا، جس میں روس نے 537 ڈرون اور میزائل داغے۔ یوکرین نے 211 ڈرون اور 38 میزائل تباہ کر دیے، تاہم باقی الیکٹرانک جیمنگ اور ڈیکوائز کے باعث نشانہ نہ بن سکے۔
اس حملے میں کم از کم 12 شہری زخمی ہوئے، جن میں بچے بھی شامل تھے، جبکہ کئی گھروں، اسکولوں اور صنعتی مراکز کو نقصان پہنچا۔ چیرکاسی میں میزائلوں نے رہائشی عمارتوں اور کالج کو نشانہ بنایا، جبکہ لویو میں صنعتی تنصیب پر حملے سے بجلی منقطع ہو گئی۔
صدر زیلنسکی نے اوستیمنکو کو ملک کا اعلیٰ ترین اعزاز بعد از شہادت عطا کیا اور امریکہ سے فوری پیٹریاٹ میزائل نظام دینے کی اپیل کی۔ ان کا کہنا تھا کہ روس اس وقت تک نہیں رکے گا جب تک اس کے پاس بڑے پیمانے پر حملے کی صلاحیت موجود ہے۔
