وزیر اعظم نریندر مودی نے کیا یو ای آر۔ٹو کا افتتاح، دہلی این سی آر جائیداد میں نئی جان

نئی دہلی میں وزیرِاعظم نریندر مودی نے اتوار کے روز شہری توسیعی سڑک۔دو (یو۔ای۔آر۔2) اور دوارکا ایکسپریس وے کے دہلی حصے کا افتتاح کیا، جسے قومی دارالحکومت کے لیے ایک بڑا انفراسٹرکچر سنگِ میل قرار دیا جا رہا ہے۔

یہ منصوبہ تقریباً 8 ہزار کروڑ روپے کی لاگت سے مکمل ہوا ہے۔ یو۔ای۔آر۔2 کی لمبائی 76 کلومیٹر ہے جو علی پور کو مہیپالپور سے جوڑتی ہے اور راستے میں منڈکا، بکر والا، نجف گڑھ اور دوارکا جیسے اہم علاقوں کو سہولت فراہم کرتی ہے۔ یہ نیا کوریڈور دہلی ایئرپورٹ سے جُڑے شہروں تک سفر کے وقت میں بڑی کمی لائے گا اور ٹریفک کے دباؤ کو کم کرے گا۔

ماہرین کے مطابق یہ سڑک دہلی۔چنڈی گڑھ، دہلی۔روہتک اور دہلی۔ممبئی ایکسپریس وے سے جڑنے کے باعث نقل و حمل کو تیز اور کم خرچ بنائے گی، جس سے سونی پت، پانی پت، کرنال، امبالہ، روہتک، جند اور بہادرگڑھ جیسے شہروں کو بھی فائدہ ہوگا۔

ریئل اسٹیٹ کے شعبے میں اس منصوبے کو ایک گیم چینجر قرار دیا جا رہا ہے۔ دوارکا اور نجف گڑھ رہائشی منصوبوں کے لیے پرکشش مقامات بن رہے ہیں جبکہ گڑگاؤں اور گریٹر نوئیڈا میں لگژری ہاؤسنگ اور دفتری منصوبوں کی طلب میں اضافہ متوقع ہے۔ ماہرین کا کہنا ہے کہ بہادرگڑھ اور روہتک میں زمین کی قیمتیں آئندہ ڈیڑھ سال میں 20 سے 30 فیصد تک بڑھ سکتی ہیں۔

یہ منصوبہ نہ صرف دہلی بلکہ پورے این سی آر میں معیشت، کاروبار اور رہائش کے شعبوں کو نئی سمت دے گا۔