غیر ملکی فلموں پر 100 فیصد ٹیکس کی ٹرمپ کی دھمکی
امریکہ کے سابق صدر ڈونالڈ ٹرمپ نے غیر ملکی فلموں پر سخت موقف اختیار کرتے ہوئے اعلان کیا ہے کہ وہ امریکہ میں بننے والی فلمی صنعت کو بچانے کے لیے بیرون ملک بننے والی تمام فلموں پر 100 فیصد ٹیکس عائد کرنے کا ارادہ رکھتے ہیں۔
اتوار کی رات اپنے سوشل میڈیا پلیٹ فارم "ٹروتھ سوشل” پر جاری بیان میں ٹرمپ نے کہا کہ انہوں نے محکمہ تجارت اور امریکی تجارتی نمائندہ کے دفتر کو ہدایت دی ہے کہ وہ بیرون ملک تیار ہونے والی کسی بھی فلم پر سو فیصد ٹیرف لگائیں۔
انہوں نے شکایت کی کہ امریکی فلمی صنعت تیزی سے زوال کا شکار ہے جبکہ دیگر ممالک فلمسازوں اور اسٹوڈیوز کو اپنی طرف راغب کرنے کے لیے مختلف قسم کی مراعات دے رہے ہیں۔
ٹرمپ کے مطابق یہ صرف کاروباری مسئلہ نہیں بلکہ قومی سلامتی کا خطرہ بھی ہے کیونکہ غیر ملکی فلموں کے ذریعے "پروپیگنڈا” کیا جا رہا ہے۔
یہ واضح نہیں ہو سکا کہ یہ ٹیکس کیسے نافذ ہوگا کیونکہ اکثر فلمیں امریکہ سمیت دنیا کے مختلف ممالک میں شوٹ کی جاتی ہیں۔ جیسے کہ آنے والی بڑی فلم "مشن امپاسیبل: دی فائنل ریکننگ” دنیا بھر میں فلمائی گئی ہے۔
ماہرین کا کہنا ہے کہ اس قسم کا اقدام بین الاقوامی فلمی صنعت کے لیے مشکلات پیدا کر سکتا ہے اور فلموں کے عالمی اشتراک میں رکاوٹ بن سکتا ہے۔
