یوکرین سرحد کے قریب روس میں دو پلوں پر دھماکے، سات ہلاک، بہت سے زخمی

روس کے یوکرین سے متصل علاقوں برائنسک اور کورسک میں دو مختلف پل دھماکوں کے باعث گر گئے، جنہیں روسی حکام نے ’’دہشتگردی‘‘ قرار دیا ہے۔ ان واقعات میں کم از کم سات افراد ہلاک اور 71 زخمی ہوئے۔

برائنسک کے گورنر الیگزینڈر بوگوماز کے مطابق ہفتہ کی رات ایک سڑک کا پل ریلوے لائن پر گر گیا، جس کے نتیجے میں ماسکو جانے والی مسافر ٹرین پٹڑی سے اتر گئی۔ اس حادثے میں سات افراد ہلاک اور 44 افراد اسپتال میں داخل کیے گئے ہیں۔ سوشل میڈیا پر سامنے آنے والی ویڈیوز میں دیکھا جا سکتا ہے کہ ریسکیو اہلکار تباہ حال ٹرین کے ڈھانچے پر چڑھ کر لوگوں کو نکال رہے ہیں، جبکہ ایک ویڈیو میں لوگوں کی چیخ و پکار سنائی دے رہی ہے۔

دوسرا واقعہ اتوار کی صبح کورسک کے ضلع ژیلیزن وورسک میں پیش آیا، جہاں ایک ریل پل ٹوٹ کر سڑک پر گر گیا، جس کی زد میں آ کر ایک مال گاڑی پٹڑی سے اتر گئی۔ اس واقعے میں انجن کا ایک ڈرائیور زخمی ہوا اور پوری ٹیم کو اسپتال منتقل کیا گیا۔

روسی حکام نے ان دھماکوں کے پیچھے کسی مخصوص گروہ کا نام نہیں لیا، تاہم تحقیقاتی اداروں نے ان واقعات کو دہشتگردی قرار دیتے ہوئے تحقیقات شروع کر دی ہیں۔ روسی صدر ولادیمیر پیوٹن کو ان واقعات کے بارے میں مسلسل بریفنگ دی جاتی رہی۔

روس کے اعلیٰ عہدیدار اور حکمران جماعت کے رکن آندرے کلیشاس نے یوکرین کو ان واقعات کا ذمہ دار قرار دیا ہے، تاہم یوکرین کی جانب سے کوئی فوری ردعمل سامنے نہیں آیا۔

روسی ریلوے نیٹ ورک گزشتہ چند برسوں میں متعدد بار تخریب کاری کا نشانہ بن چکا ہے، خاص طور پر جب سے روس نے 2022 میں یوکرین پر مکمل حملہ شروع کیا ہے۔