بنجارہ ہلز میں نالے پر سڑک بیٹھ گئی، واٹر ٹینکر گرنے سے حادثہ، کوئی جانی نقصان نہیں

حیدرآباد کے پوش علاقے بنجرہ ہلز کے نوین نگر میں ایک نجی 10,000 لیٹر پانی کا ٹینکر نالے پر سے گزرتے ہوئے اچانک زمین میں دھنس گیا، جس کے نتیجے میں سڑک کا بڑا حصہ بیٹھ گیا۔ خوش قسمتی سے کسی قسم کا جانی نقصان یا چوٹ کی اطلاع نہیں ملی، تاہم ٹریفک کی روانی بری طرح متاثر ہوئی۔

یہ واقعہ منگل کی صبح تقریباً 11 بجے پیش آیا، جب مہیشوری چیمبرز سے پانی بھر کر لایا جانے والا ٹینکر نالے کے اوپر سے گزر رہا تھا۔ نالہ اچانک بیٹھ گیا، جس کی وجہ سے سڑک کا کچھ حصہ بھی زمین میں دھنس گیا۔ حادثے کے فوراً بعد ٹینکر کا ڈرائیور موقع سے فرار ہوگیا، جبکہ کئی گاڑیاں پھنس گئیں۔

پیر کی رات ہونے والی موسلا دھار بارش کے بعد یہ پہلا بڑا واقعہ تھا، جس نے جی ایچ ایم سی (بلدیہ عظمیٰ حیدرآباد) کی کارکردگی پر سوالات اٹھا دیے ہیں۔ موقع پر پولیس اور صفائی عملہ پہنچا اور صورتحال کا جائزہ لیا۔

ابتدائی تحقیقات سے معلوم ہوا ہے کہ نالے کی بنیاد پہلے سے ہی کمزور تھی، اور بھاری گاڑیوں کی آمدورفت سے یہ نقصان پیش آیا۔ مکینوں نے شدید برہمی کا اظہار کرتے ہوئے کہا کہ سڑکوں اور نالوں کی خستہ حالی پر بارہا شکایات کی گئی تھیں.