ریونت ریڈی کا بڑا اعلان: تلنگانہ میں میٹرو کا دائرہ مزید وسیع
تلنگانہ حکومت آئندہ ہفتے کابینہ کے اجلاس میں حیدرآباد میٹرو فیز-2 (پارٹ-بی) منصوبے کی تفصیلی رپورٹ (ڈی پی آر) کی منظوری دے گی، جس کے تحت جوبلی بس اسٹیشن (جے بی ایس) سے میڈچل اور شاہ میر پیٹ تک میٹرو توسیع کی جائے گی۔ ساتھ ہی شمس آباد ایئرپورٹ سے فیوچر سٹی تک میٹرو لائن کی بھی منظوری متوقع ہے۔
وزیر اعلیٰ اے ریونت ریڈی نے یکم جنوری کو اس منصوبے کو عوام کے لیے نئے سال کا تحفہ قرار دیا تھا۔ ان کی ہدایت پر حیدرآباد ایئرپورٹ میٹرو لمیٹڈ (HAML) نے تین بڑی لائنوں کے لیے رپورٹ تیار کی۔ پہلی لائن 23 کلومیٹر پر محیط ہوگی جو پیراڈائز سے مدچل تک جائے گی، دوسری 22 کلومیٹر کی لائن جے بی ایس سے شامیرپیٹ تک ہوگی، اور تیسری 40 کلومیٹر طویل لائن ایئرپورٹ سے فیوچر سٹی کو جوڑے گی۔
مدچل لائن تادبند، بوئن پلی، سچترا سرکل اور کومپلی سے گزرے گی جبکہ شامیرپیٹ لائن وکرام پوری، کارخانہ، الوال اور بولارم سے ہوتی ہوئی جائے گی۔
یہ منصوبے مرکزی اور ریاستی حکومت کے اشتراک سے مکمل کیے جائیں گے۔ اس بار میٹرو لائنوں کے ساتھ جدید ڈبل ڈیکر اسٹرکچر بھی تجویز کیے گئے ہیں، جن میں میٹرو اور سڑک دونوں شامل ہوں گے۔
ٹریفک کے دباؤ کو کم کرنے کے لیے ایچ ایم ڈی اے نے بھی دو بلند راہداریاں تجویز کی ہیں، جنہیں پبلک پرائیویٹ پارٹنرشپ (PPP) کے تحت تعمیر کیا جائے گا۔
