ریونت ریڈی کا بڑا فیصلہ: شیشادری کو سی ایم او میں کلیدی اختیارات
تلنگانہ کے وزیر اعلیٰ ریونت ریڈی نے جمعہ کے روز اپنے دفتر میں افسران کے درمیان محکموں کی نئی تقسیم کا اعلان کیا، تاکہ انتظامیہ میں بہتری لائی جا سکے اور مختلف محکموں کے درمیان بہتر ہم آہنگی کو یقینی بنایا جا سکے۔
وزیر اعلیٰ کے پرنسپل سیکریٹری وی شیشادری بدستور سی ایم او کے انچارج رہیں گے اور انہیں کئی اہم محکموں کی نگرانی سونپی گئی ہے۔ ان میں عام انتظامیہ، قانون و انصاف، داخلہ، مالیات، منصوبہ بندی، اراضی، خوراک، زرعی اجناس، زراعت، حیوانات، دودھ، کوآپریٹو اور مارکیٹنگ شامل ہیں۔ تمام پالیسی فیصلوں سے قبل ان سے مشاورت لازمی قرار دی گئی ہے۔
ریٹائرڈ آئی اے ایس افسر کے سرینواس راجو، جنہیں حال ہی میں سی ایم او میں شامل کیا گیا ہے، کو ٹرانسپورٹ، عمارات و سڑکیں، رہائش، مذہبی اوقاف، اطلاعات و تعلقات عامہ، کھیل، ثقافت، نوجوانوں کی خدمات اور سیاحت کے شعبے دیے گئے ہیں۔
سی ایم کے سیکریٹری کے منیکا راج کو بلدی نظم و نسق، شہری ترقی، آبپاشی، تجارتی ٹیکس، صحت و خاندانی بہبود، پنچایت راج، دیہی ترقی اور دیہی آبی فراہمی کی ذمہ داری دی گئی ہے۔
خصوصی سیکریٹری بی اجیت ریڈی کو توانائی، تعلیم، صنعت، انفارمیشن ٹیکنالوجی، محنت و روزگار، اور سی ایم سیکیورٹی سمیت تقرریوں اور دفتر کے انتظام کی نگرانی دی گئی ہے۔
خصوصی فرائض کے افسر ویملہ سرینواسولو کو خواتین، بچوں، معذورین، بزرگوں کی فلاح، ماحولیات، سائنس، اقلیتی و پسماندہ طبقات کی بہبود، عوامی شکایات، وزیر اعلیٰ ریلیف فنڈ اور کمپیوٹرائزیشن کا ذمہ دار بنایا گیا ہے۔
