ریونت ریڈی نے مس ورلڈ 2025 کا شاندار افتتاح حیدرآباد میں کیا

تلنگانہ کے دارالحکومت حیدرآباد میں مس ورلڈ 2025 کے 72ویں عالمی مقابلے کا شاندار آغاز ہوا۔ اس بین الاقوامی ایونٹ کا افتتاح وزیر اعلیٰ اے ریونت ریڈی نے ہفتہ کی شب گچی باؤلی انڈور اسٹیڈیم میں ہزاروں ناظرین کی موجودگی میں کیا۔

تقریب کا آغاز تلنگانہ کے ترانے سے ہوا جسے معروف شاعر اندے سری نے لکھا اور ایم ایم کیروآنی نے موسیقی دی۔ پچاس طلبہ پر مشتمل کورس نے یہ ترانہ پیش کیا جنہیں استاد کومندوری رام آچاری نے تربیت دی تھی۔ اس کے بعد "پرینی ناٹیم” رقص پیش کیا گیا جس میں 250 خواتین نے حصہ لیا۔

تقریب میں تلنگانہ کے مختلف ثقافتی رقص جیسے کومّو کویا، گُسادی، لَمبادی ڈپو اور اوگو ڈولو کو بھی پیش کیا گیا۔ ہر براعظمی مقابلہ سے قبل فنکاروں نے روایتی موسیقی اور رقص کے ذریعے شرکاء کا تعارف کروایا۔

جب مس انڈیا نندنی گپتا اسٹیج پر آئیں تو حاضرین نے پرجوش انداز میں خیرمقدم کیا۔ مس فلپائن کو بھی خاصی پذیرائی ملی۔ حیدرآباد میں مقیم فلپائنی خاتون روبی نے دوستوں کے ساتھ تقریب میں شرکت کی اور بتایا کہ یہ لمحہ ان کے لیے جذباتی تھا۔

تقریب میں موجود ایک نوجوان انکور نے کہا: "یہ لمحہ بہت خاص تھا جب بھارتی پرچم کو اسٹیج پر لہرایا گیا، ایسا لگا کہ پوری دنیا ایک جگہ اکٹھی ہے اور تلنگانہ کی سرزمین سے امن کا پیغام جا رہا ہے۔”