مودی کی صدارت میں دفاعی اجلاس، پاکستان سے کشیدگی زیر بحث
وزیر اعظم نریندر مودی نے ہفتہ کے روز ملک کی اعلیٰ دفاعی قیادت کے ساتھ ایک اہم اجلاس کی صدارت کی، جس میں پاکستان کے ساتھ بڑھتی ہوئی سرحدی کشیدگی اور سیکیورٹی صورتحال کا تفصیلی جائزہ لیا گیا۔
اجلاس میں وزیر دفاع راج ناتھ سنگھ، قومی سلامتی مشیر اجیت ڈوول، تینوں افواج کے سربراہان اور چیف آف ڈیفنس اسٹاف جنرل انیل چوہان شریک ہوئے۔ اجلاس کا مقصد پاکستان کی جانب سے جاری حملوں کے تناظر میں دفاعی حکمت عملی طے کرنا اور مستقبل کے اقدامات پر غور کرنا تھا۔
ذرائع کے مطابق، پاکستانی افواج کی جانب سے سرحدی علاقوں میں فوجی نقل و حرکت دیکھی گئی ہے۔ کرنل صوفیہ قریشی نے ایک پریس بریفنگ میں بتایا کہ پاکستان اپنی فوج کو اگلے مورچوں کی جانب منتقل کر رہا ہے، جو کہ موجودہ کشیدگی میں اضافے کی علامت ہے۔
ونگ کمانڈر ویومیکا سنگھ اور خارجہ سیکریٹری وکرم مسری نے بھی اس موقع پر کہا کہ ہندوستانی افواج دشمن کے حملوں کا منہ توڑ جواب دے رہی ہیں اور ملکی سلامتی کے تحفظ کے لیے مکمل تیار ہیں۔
یہ اجلاس ایسے وقت میں ہوا ہے جب دونوں ممالک کی افواج ایک دوسرے کی فوجی تنصیبات کو نشانہ بنا رہی ہیں اور سرحد پر کشیدگی میں اضافہ ہو رہا ہے۔
