وزیر اعظم مودی کی صدر دروپدی مرمو سے ملاقات
وزیر اعظم نریندر مودی نے ہفتہ کو صدر جمہوریہ دروپدی مرمو سے راشٹرپتی بھون میں ملاقات کی۔ سرکاری ذرائع کے مطابق اس ملاقات کی تفصیلات فی الحال منظر عام پر نہیں آئیں۔
یہ ملاقات ایسے وقت میں ہوئی ہے جب وزیر اعظم مودی حال ہی میں جاپان اور چین کے دورے سے واپس آئے ہیں۔ انہوں نے تیانجن میں شنگھائی تعاون تنظیم (ایس سی او) کے 25 ویں اجلاس میں شرکت کی، جہاں ان کی چینی صدر شی جن پنگ اور روسی صدر ولادیمیر پوتن سے اہم ملاقاتیں ہوئیں۔
ملاقات سے ایک دن قبل وزیر اعظم کی رہائش گاہ پر نیشنل ڈیموکریٹک الائنس (این ڈی اے) کے ارکان پارلیمنٹ کے لیے طے شدہ ڈنر شدید بارشوں اور شمالی بھارت میں تباہ کن سیلاب کے باعث منسوخ کردیا گیا۔ بھارتیہ جنتا پارٹی کے صدر جے پی نڈا کی جانب سے بھی اسی دن منعقد ہونے والا ڈنر پروگرام ملتوی کیا گیا۔
صدر دروپدی مرمو نے بھی حالیہ بارشوں، کلاؤڈ برسٹ اور طغیانی سے ہونے والی تباہی پر گہری تشویش ظاہر کی ہے اور ریسکیو اہلکاروں کی کاوشوں کو سراہا ہے۔
