حیدرآباد میں شدید بارش، فلیش فلڈ کا خدشہ، اورنج الرٹ جاری

حیدرآباد میں جمعرات 7 اگست کو گرج چمک کے ساتھ تیز بارشوں کے بعد محکمہ موسمیات نے اورنج الرٹ جاری کر دیا ہے۔ مسلسل ہلکی بارشوں اور نمی کے بعد ہونے والی اس شدید بارش سے شہریوں کو وقتی راحت ملی، مگر اب شہر میں فلیش فلڈ کا خدشہ ظاہر کیا جا رہا ہے۔

محکمہ موسمیات کے مطابق شہر کے کچھ علاقوں میں کلاؤڈ برسٹ جیسے حالات پیدا ہوئے ہیں، جس سے اچانک سیلاب کا خطرہ بڑھ گیا ہے۔ تیز ہواؤں کی رفتار 60 کلومیٹر فی گھنٹہ تک پہنچنے کا امکان ہے، جو کمزور تعمیرات کو نقصان پہنچا سکتی ہیں۔ شہریوں کو ہدایت دی گئی ہے کہ بجلی چمکنے کے دوران کھلی جگہوں سے دور رہیں اور ضرورت پڑنے پر محفوظ مقامات پر منتقل ہو جائیں۔

جی ایچ ایم سی کے مطابق شہر کے جنوبی علاقوں جیسے راجندرنگر، فلک نما، چندرائن گٹہ، ایل بی نگر اور چارمینار میں 2 سے 5 سینٹی میٹر فی گھنٹہ کے حساب سے تیز بارش متوقع ہے، جبکہ دیگر علاقوں میں درمیانی سے تیز بارش کا امکان ہے۔

محکمہ آفات، پولیس اور بلدیاتی اداروں کو الرٹ پر رکھا گیا ہے تاکہ پانی جمع ہونے، درخت گرنے اور ٹریفک میں رکاوٹ جیسے مسائل سے نمٹا جا سکے۔ شہریوں سے گزارش ہے کہ وہ غیر ضروری طور پر گھروں سے باہر نہ نکلیں اور ہنگامی صورت حال میں متعلقہ حکام سے رابطہ کریں۔