ایران پر امریکی حملے کے نصف سے زائد امریکی عوام خلاف ہیں

واشنگٹن پوسٹ کی جانب سے کیے گئے ایک تازہ عوامی سروے کے مطابق، تقریباً نصف امریکی شہری ایران پر فضائی حملوں کی مخالفت کر رہے ہیں۔ بدھ کو کیے گئے اس سروے میں ایک ہزار سے زائد افراد نے اپنی رائے دی۔

سروے کے نتائج کے مطابق 45 فیصد امریکی شہری ایران پر حملے کے خلاف ہیں، جبکہ صرف 25 فیصد نے اس اقدام کی حمایت کی ہے۔ بقیہ 30 فیصد افراد نے کسی واضح رائے کا اظہار نہیں کیا۔ یہ سروے مشرقِ وسطیٰ میں ایران اور اسرائیل کے درمیان کشیدہ حالات کے پس منظر میں سامنے آیا ہے۔

یہ اعداد و شمار امریکی عوام میں جنگی کارروائیوں کے حوالے سے پائے جانے والے شکوک و شبہات کو ظاہر کرتے ہیں۔ مخالفین اور حامیوں کے درمیان 20 فیصد کا فرق اس بات کا ثبوت ہے کہ ایک بڑی تعداد فوجی کارروائی کے خلاف ہے۔

سروے میں شامل دو تہائی ڈیموکریٹس نے ایران پر حملے کی کھل کر مخالفت کی، جس سے ظاہر ہوتا ہے کہ اس جماعت میں امن پسند خیالات زیادہ ہیں۔ ریپبلکنز میں 47 فیصد افراد نے حملے کی حمایت کی، 24 فیصد نے مخالفت اور 29 فیصد نے کوئی واضح موقف نہیں اپنایا۔

ٹرمپ کے حامیوں میں 46 فیصد نے حملے کی حمایت کی، جبکہ 26 فیصد نے مخالفت کی اور 28 فیصد نے کوئی رائے نہیں دی۔

تقریباً ایک پانچواں حصہ امریکی شہریوں کا ماننا ہے کہ ایران کا جوہری پروگرام امریکہ کے لیے فوری اور سنگین خطرہ ہے، جبکہ نصف سے زائد اسے "کچھ حد تک خطرناک” قرار دیتے ہیں۔

چالیس فیصد سے زائد امریکی شہری اس بات پر تشویش کا اظہار کر رہے ہیں کہ امریکہ ایران کے ساتھ مکمل جنگ میں ملوث نہ ہو جائے۔