مکیش امبانی کا بڑا قدم: نیویارک کے ٹری بیکا میں 17.4 ملین ڈالر کی شاندار عمارت خرید لی

بھارت کے سب سے بڑے صنعتکار اور ریلائنس انڈسٹریز کے سربراہ مکیش امبانی نے امریکہ کے شہر نیویارک کے مشہور ٹری بیکا (Tribeca) علاقے میں ایک شاندار بلڈنگ خرید لی ہے۔ اس خریداری پر امبانی نے 17.4 ملین ڈالر (تقریباً 145 کروڑ بھارتی روپے) خرچ کیے ہیں۔

یہ عمارت ہبرٹ اسٹریٹ پر واقع ہے جو گزشتہ دس برسوں سے خالی پڑی تھی۔ اس سے قبل اس عمارت کے مالک امریکی ٹیکنالوجی بلینیئر رابرٹ پیرا تھے، جنہوں نے 2018 میں اسے تقریباً 20 ملین ڈالر میں خریدا تھا۔ پیرا نے اس عمارت کو ایک شاندار حویلی میں تبدیل کرنے کا منصوبہ بنایا تھا لیکن وہ کبھی مکمل نہ ہو سکا۔

دلچسپ بات یہ ہے کہ مکیش امبانی نے اگست 2023 میں نیویارک کے ویسٹ ولیج علاقے میں واقع اپنی پرانی رہائش گاہ کو 9 ملین ڈالر میں فروخت کیا تھا۔ یہ رہائش دو بیڈرومز پر مشتمل تھی اور دریائے ہڈسن کا دلکش منظر پیش کرتی تھی۔

عمارت کے بارے میں دستیاب منصوبہ بندی کے مطابق، یہاں ایک مکمل فلور پر پرائمری سوئٹ، ورک اسپیس، این بی اے سائز باسکٹ بال کورٹ، دو منزلہ بلند رہائشی ہال، خوبصورت صحن، ڈائننگ روم اور بار سمیت کئی جدید سہولتیں شامل کرنے کی تیاری تھی۔ ایک اور ڈیزائن میں سات بیڈرومز، آدھی اولمپک سائز سوئمنگ پول اور 5,000 مربع فٹ اوپن اسپیس کی تجویز بھی شامل تھی۔

یہ خریدار مکیش امبانی کے امریکہ میں بڑھتے ہوئے بزنس اور سرمایہ کاری کے رجحان کو ظاہر کرتا ہے۔ تجزیہ کاروں کا کہنا ہے کہ یہ خریداری نہ صرف نیویارک میں ریلائنس کی موجودگی کو مضبوط کرے گی بلکہ عالمی مارکیٹ میں بھارتی بزنس لیڈرشپ کی بڑھتی ہوئی پہچان کو بھی مزید اجاگر کرے گی۔