کینیڈا میں کیفے پر فائرنگ کے بعد کپل شرما کی سیکیورٹی میں اضافہ
مشہور کامیڈین اور اداکار کپل شرما کی سیکیورٹی ممبئی پولیس نے بڑھا دی ہے۔ یہ اقدام اس وقت سامنے آیا جب کینیڈا میں ان کے کیفے پر فائرنگ کے دو واقعات پیش آئے اور لارنس بشنوئی گینگ نے سلمان خان سے تعلقات کی وجہ سے دھمکیاں دیں۔
جمعہ کو کینیڈا کے شہر سوری میں کپل شرما کے "کپس کیفے” پر رواں ماہ دوسری بار فائرنگ کی گئی۔ سوشل میڈیا پر وائرل ویڈیو میں کم از کم 25 گولیوں کی آوازیں سنائی دیتی ہیں اور ایک شخص کی آواز آتی ہے کہ "ہدف کو کال کی تھی لیکن جواب نہیں ملا، اس لیے کارروائی کرنی پڑی، اگر اب بھی جواب نہ ملا تو اگلا قدم ممبئی میں ہوگا۔”
یہ حملے دو گینگز — گولڈی ڈھلوں گروپ اور لارنس بشنوئی گینگ — نے سوشل میڈیا پر قبول کیے۔ پہلی فائرنگ 10 جولائی کو ہوئی تھی جب کیفے کے اندر ملازمین موجود تھے، خوش قسمتی سے کوئی جانی نقصان نہیں ہوا۔
یاد رہے کہ سلمان خان پر 1998 میں کالے ہرن کے شکار کے کیس کے بعد سے بشنوئی گینگ کی دھمکیاں جاری ہیں، اور گزشتہ سال اپریل میں ان کے گھر کے باہر فائرنگ کے بعد انہیں سخت سیکیورٹی فراہم کی گئی ہے۔
