افغانستان میں زلزلہ متاثرین کیلئے بھارت کی بڑی امداد، 21 ٹن سامان کابل پہنچا

افغانستان میں حالیہ خوفناک زلزلے سے ہلاکتوں اور تباہی کے بعد بھارت نے انسانی ہمدردی کی بنیاد پر بڑی امداد روانہ کی ہے۔ وزارتِ خارجہ کے مطابق منگل کے روز بھارت نے 21 ٹن امدادی سامان بذریعہ فضائی جہاز کابل پہنچایا۔

اس سامان میں کمبل، خیمے، صاف ستھرائی کٹس، پانی ذخیرہ کرنے کے ٹینک، جنریٹر، باورچی خانے کے برتن، پینے کے پانی کو صاف کرنے کے آلات، سونے کے بیگ، ضروری ادویات، وہیل چیئرز، سینیٹائزر، پانی صاف کرنے والی گولیاں اور دیگر طبی اشیاء شامل ہیں۔

واضح رہے کہ مشرقی افغانستان میں اتوار کی رات 6.0 شدت کے زلزلے سے 1,400 سے زائد افراد جاں بحق جبکہ ڈھائی ہزار سے زیادہ زخمی ہوئے تھے۔ متاثرہ علاقوں میں مکانات اور بنیادی ڈھانچے کو بھی شدید نقصان پہنچا ہے۔

وزیرِاعظم نریندر مودی نے کہا ہے کہ بھارت مشکل کی اس گھڑی میں افغانستان کے عوام کے ساتھ کھڑا ہے اور ہر ممکن انسانی ہمدردی پر مبنی امداد فراہم کرتا رہے گا۔ وزیرِ خارجہ ایس جے شنکر نے بھی کہا کہ بھارت زمینی حالات پر مسلسل نظر رکھے ہوئے ہے اور آئندہ دنوں میں مزید امدادی سامان بھیجا جائے گا۔