حیدرآباد میں بڑے پیمانے پر غیرقانونی مکانات کی انہدامی کارروائی، غازی لورامارم میں 300 ایکڑ زمین واگزار

حیدرآباد ڈیولپمنٹ اتھارٹی نے ایک بار پھر بڑے پیمانے پر غیر قانونی تعمیرات کے خلاف کارروائی کی ہے۔ کوتبولاپور اسمبلی حلقہ کے غازی لورامارم علاقے میں سروے نمبر 397 کے تحت 300 ایکڑ سے زیادہ سرکاری زمین پر بنے مکانات اور دیگر تعمیرات کو بلڈوزروں کی مدد سے منہدم کر دیا گیا۔

اس کارروائی کے بعد متاثرہ افراد نے سخت برہمی کا اظہار کرتے ہوئے کہا کہ وہ زمین خرید کر یہاں رہائش پذیر ہوئے تھے اور اصل ذمہ دار وہ افراد ہیں جنہوں نے ان سے رقوم لے کر پلاٹس فروخت کیے۔ کئی خواتین نے الزام لگایا کہ ’’ہمیں بے گھر کر دیا گیا، ہمارے بچوں کے ساتھ سڑکوں پر لایا گیا‘‘۔

مقامی افراد نے احتجاج کرتے ہوئے پولیس اور حکام کو روکنے کی کوشش کی لیکن انہیں ہٹا دیا گیا۔ سرکاری ریکارڈ کے مطابق یہ زمین کئی دہائیاں پہلے فنانس کارپوریشن، ہاؤسنگ بورڈ اور دیگر محکموں کو دی گئی تھی، لیکن استعمال نہ ہونے کی وجہ سے یہ زمین مافیا کے قبضے میں چلی گئی۔

کمشنر رگھناتھ نے وضاحت کی کہ صرف کمرشل شیڈز، کمپاؤنڈ وال اور غیرقانونی کمرے گرائے جا رہے ہیں جبکہ غریبوں کی رہائش کو فی الحال نہیں چھیڑا جا رہا۔ انہوں نے بتایا کہ کئی جعلی دستاویزات اور فرضی رجسٹریاں برآمد ہوئی ہیں۔ تقریباً 13 ہزار کروڑ روپے مالیت کی 275 ایکڑ زمین حکومت نے واگزار کر لی ہے اور جلد ہی یہاں حفاظتی باڑ لگائی جائے گی۔