حیدرآباد میں بارش کا قہر، سڑکیں ندی بن گئیں
حیدرآباد اور سکندرآباد میں جمعرات کی شام اچانک ہونے والی طوفانی بارش نے شہر کی صورتحال کو مفلوج کر دیا۔ شدید بارش کے باعث کئی نشیبی علاقے زیرِ آب آگئے اور سڑکوں پر پانی جمع ہونے سے ٹریفک بری طرح متاثر ہوا۔ جوبلی ہلز، بنجارہ ہلز، پنجہ گٹہ، فلم نگر، ایررا گوڈا، یوسف گوڈا، عامرپیٹ، بورابنڈہ اور چارمینار کے علاقوں میں گاڑیوں کی لمبی قطاریں لگ گئیں، جبکہ متعدد مقامات پر بجلی کی فراہمی بھی منقطع ہوگئی۔
محکمہ موسمیات حیدرآباد نے ریاست تلنگانہ کے لیے پیلا انتباہ جاری کرتے ہوئے 18 اور 19 ستمبر کو گرج چمک، تیز ہوائیں اور شدید بارش کی پیش گوئی کی ہے۔ کاماریڈی، میدک، سنگاریڈی، سدی پیٹ، ویکارباد، سوریاپیٹ اور ناگرکرنول میں 30 سے 40 کلومیٹر فی گھنٹہ کی رفتار سے ہوائیں چلنے کا امکان ظاہر کیا گیا ہے۔
ادھر بدھ کی رات ایک افسوسناک واقعہ میں 26 سالہ نوجوان بارش کے پانی سے بھرے ریلوے انڈرپاس میں ڈوب کر ہلاک ہوگیا۔ وہ اسکوٹر پر گھر لوٹ رہا تھا کہ پانی کے تیز بہاؤ میں پھنس گیا۔ پولیس نے لاش برآمد کر کے قانونی کارروائی شروع کر دی۔
