کھلے مین ہول کا خطرہ، حیدرآباد میں اسکول بچی حادثے سے بال بال بچی

حیدرآباد کے یاقوت پورہ علاقے میں جمعرات، 11 ستمبر کو ایک افسوسناک واقعہ پیش آیا جب ایک پانچ سالہ اسکول جانے والی بچی کھلے مین ہول میں جا گری۔ یہ واقعہ مولا کا چلہ علاقے میں پیش آیا جب بچی اپنی ماں کے ساتھ اسکول جا رہی تھی۔

خوش قسمتی سے مین ہول میں اس وقت پانی کا بہاؤ نہیں تھا، جس کے باعث بڑا حادثہ ٹل گیا۔ بچی کی ماں نے فوری طور پر حاضر دماغی کا مظاہرہ کرتے ہوئے اپنی معصوم بیٹی کو باہر کھینچ لیا۔ ویڈیو میں صاف دیکھا جا سکتا ہے کہ کس طرح بچی اچانک مین ہول میں گر گئی اور لمحوں میں ماں نے اسے بچا لیا۔

بچی کو معمولی چوٹیں آئیں، تاہم واقعے نے مقامی عوام کو جھنجھوڑ کر رکھ دیا ہے۔ بچی کی ماں اسے فوری طور پر گھر لے گئیں۔

اس افسوسناک واقعے نے ایک بار پھر شہری انتظامیہ کی کارکردگی پر بڑے سوالات کھڑے کر دیے ہیں۔ آخر کھلا مین ہول کس کی غفلت کا نتیجہ ہے؟ عوام پوچھنے پر مجبور ہیں کہ چھوٹے بچے اگر اپنی جانوں کے خطرے میں پڑیں تو اس کی ذمہ داری کون قبول کرے گا؟

یہ سانحہ اس امر کی کھلی دلیل ہے کہ شہر میں عوامی جان و مال کے تحفظ کے بنیادی تقاضوں کو یکسر فراموش کیا جا رہا ہے۔ اگر فوری طور پر ضروری احتیاطی اقدامات نہ کیے گئے تو یہ غفلت کسی ہولناک حادثے کا سبب بن سکتی ہے۔