سورج کی کتنی دھوپ کافی ہے؟ وٹامن ڈی کا راز
وٹامن ڈی ہڈیوں کی صحت کے لیے نہایت ضروری ہے اور ہماری جلد سورج کی روشنی کے ذریعے اس وٹامن کو پیدا کرتی ہے۔ لیکن سوال یہ ہے کہ روزمرہ کی ضروریات پوری کرنے کے لیے ہمیں سورج میں کتنا وقت گزارنا چاہیے؟
تحقیقات کے مطابق موسم بہار اور گرمیوں کے دوران دن کے درمیانی حصے میں تقریباً دس منٹ تک سورج میں رہنا — جب آپ کے جسم کا تقریباً 25 فیصد حصہ کھلا ہو (جیسے بازو اور ٹانگیں) — وٹامن ڈی کی روزمرہ ضرورت پوری کر سکتا ہے۔ لیکن سردیوں میں جب صرف چہرہ اور ہاتھ کھلے ہوں تو اسی مقدار کے لیے دو گھنٹے تک سورج میں بیٹھنا پڑتا ہے۔
ماہرین کہتے ہیں کہ سورج کی روشنی سے جلد کا کینسر ہونے کا خطرہ بھی ہے، اس لیے بہتر ہے کہ وٹامن ڈی غذا یا سپلیمنٹس کے ذریعے حاصل کیا جائے۔ سورج کی روشنی مکمل طور پر نظرانداز نہ کریں کیونکہ ہلکی دھوپ بھی وٹامن ڈی بنانے میں مدد دیتی ہے اور ساتھ ہی ذہنی دباؤ، افسردگی اور یادداشت کی کمزوری جیسے مسائل سے بھی بچاتی ہے۔
وٹامن ڈی کی اہمیت اس لیے بھی ہے کہ یہ جسم کو کیلشیم جذب کرنے میں مدد دیتا ہے، جو ہڈیوں کو مضبوط کرتا ہے۔ وٹامن ڈی2 اور ڈی3 کچھ قدرتی غذاؤں میں پائے جاتے ہیں جیسے سامن مچھلی، ٹونا، مچھلی کے جگر، بیف لیور، انڈے کی زردی، اور کچھ فورٹیفائیڈ اشیاء جیسے دودھ، سیریلز، اور نارنجی کا رس۔
وٹامن ڈی کی روزانہ تجویز کردہ مقدار 600 آئی یو (بین الاقوامی یونٹس) ہے، جب کہ 71 سال سے زائد عمر کے افراد کے لیے یہ مقدار 800 آئی یو ہے۔
وٹامن ڈی کی کمی کی علامات:
- تھکاوٹ
- ہڈیوں میں درد
- پٹھوں کی کمزوری
- افسردگی
- بار بار انفیکشن ہونا
- بالوں کا گرنا
- بھوک میں کمی
- زخم کا دیر سے بھرنا
