حیدرآباد میں موسلا دھار بارش، سڑکیں تالاب میں تبدیل، شہریوں کو گھروں میں رہنے کی ہدایت

حیدرآباد میں پیر کی شام اچانک موسلا دھار بارش نے شہر کی روزمرہ زندگی کو مفلوج کر دیا۔ شہر کے مختلف علاقوں میں شدید بارش کے باعث سڑکیں زیرِ آب آ گئیں، جس کے نتیجے میں ٹریفک جام ہو گیا اور شہریوں کو شدید پریشانی کا سامنا کرنا پڑا۔

سیکندرآباد کے علاقے پیراڈائز، مریڈپلی، ترناک، رسول پورہ، آر پی روڈ، پیٹنی، ایس پی روڈ، حبسی گوڑہ، ڈاکٹر اے ایس راؤ نگر، ای سی آئی ایل کراس روڈ، ملکاجگری اور الوال میں بارش نے تباہی مچا دی۔ نچلے علاقے مکمل طور پر پانی میں ڈوب گئے جبکہ موٹر سائیکل سواروں اور پیدل چلنے والوں کو پُلوں اور دکانوں کی چھتوں کے نیچے پناہ لینی پڑی۔

ٹریفک پولیس اور بلدیہ کے اہلکار سڑکوں سے پانی نکالنے اور ٹریفک بحال کرنے کے کام میں مصروف نظر آئے۔

ادھر حیدرآباد کے مشہور ماہرِ موسمیات ٹی بالاجی نے خطرے کی گھنٹی بجاتے ہوئے خبردار کیا کہ شہر میں "خطرناک طوفانی بارش” کا امکان ہے۔ ان کے مطابق شہر کے اوپر شدید کُمولو نِمبس بادل جمع ہو رہے ہیں اور کچھ ہی وقت میں 50 ملی میٹر بارش ہو سکتی ہے۔ انہوں نے شہریوں سے اپیل کی کہ وہ گھروں میں ہی رہیں اور محتاط رہیں۔