گیان بھارتم مشن: ہندوستانی تہذیب، ادب اور علم کی نئی آواز وزیر اعظم نریندر مودی
وزیر اعظم نریندر مودی نے کہا ہے کہ گیان بھارتم مشن ہندوستان کی تہذیب، ادب اور فکری ورثے کی مضبوط آواز بننے جا رہا ہے۔ دہلی کے وگیان بھون میں منعقدہ بین الاقوامی کانفرنس میں خطاب کرتے ہوئے وزیر اعظم نے کہا کہ یہ صرف سرکاری یا تعلیمی تقریب نہیں بلکہ ایک ایسا مشن ہے جو صدیوں کے علمی ورثے کو نئی شکل دے گا۔
انہوں نے بتایا کہ اس مشن کے تحت ایک خصوصی پورٹل بھی شروع کیا گیا ہے جس کے ذریعے قدیم نسخوں اور علمی ذخائر کو ڈیجیٹل شکل میں محفوظ کیا جا رہا ہے۔ مودی نے کہا کہ ہندوستان کے پاس دنیا کا سب سے بڑا نسخوں کا ذخیرہ ہے، جو ہماری علمی وابستگی اور تہذیبی شعور کا زندہ ثبوت ہے۔
مودی نے کہا کہ تاریخ کے نشیب و فراز میں لاکھوں نسخے ضائع ہوئے، لیکن جو بچ گئے وہ آج بھی ہمارے اسلاف کے علم و تحقیق کے گہرے جذبے کی گواہی دیتے ہیں۔ انہوں نے زور دیا کہ اس مشن کے ذریعے نئی نسل کو اپنے علمی ورثے سے جوڑنا اور ہندوستان کی فکری پہچان کو عالمی سطح پر اجاگر کرنا ہی اصل مقصد ہے۔
