ایلون مسک کا مفت گراک امیجن اے آئی، متن اور تصاویر سے جادوئی ویڈیوز تیار

ایلون مسک کی کمپنی ’’گروک‘‘ نے اپنے جدید تخلیقی فیچر ’’امیجن‘‘ کو اینڈرائیڈ صارفین کے لیے بھی مفت فراہم کر دیا ہے، جو اس سے پہلے آئی او ایس پر دستیاب تھا۔ اس فیچر کے ذریعے صارفین صرف چند الفاظ یا آواز سے ہائی کوالٹی تصاویر اور مختصر ویڈیوز بنا سکتے ہیں۔ اس کے علاوہ، کوئی بھی اسٹل تصویر اپ لوڈ کر کے اسے بہتر یا متحرک بھی کیا جا سکتا ہے۔

مسک کے مطابق اب تک پلیٹ فارم پر 4 کروڑ 40 لاکھ سے زائد تصاویر تیار ہو چکی ہیں اور یہ تعداد تیزی سے بڑھ رہی ہے۔ مفت رسائی کے ذریعے گروک براہِ راست اوپن اے آئی کے چیٹ جی پی ٹی اور گوگل کے جیمینی جیسے بڑے حریفوں کے مقابل آ گیا ہے۔

اس فیچر کا ایک نمایاں پہلو یہ ہے کہ اسٹل تصاویر کو چند سیکنڈز میں ویڈیوز میں بدلا جا سکتا ہے، جن کے لیے چار اینیمیشن اسٹائل — نارمل، فن، کسٹم اور اسپائسی — فراہم کیے گئے ہیں۔ یہ سہولت خاص طور پر اُن مواد تخلیق کرنے والوں کے لیے فائدہ مند ہے جو کم وقت میں شیئر کرنے کے قابل اینیمیشنز بنانا چاہتے ہیں۔

یہ اقدام جولائی میں گروک 4 کے لانچ کے بعد آیا ہے، اور مسک نے اعلان کیا ہے کہ 2025 کے آخر تک ’’گروک 5‘‘ بھی متعارف کرایا جائے گا، جو کارکردگی میں مزید بہتر ہو گا۔ فی الحال، اینڈرائیڈ اور آئی او ایس صارفین اس مفت موقع سے فائدہ اٹھا کر گروک کی تخلیقی صلاحیتوں کو آزما سکتے ہیں۔