بادل پھٹنے سے اتراکھنڈ میں تباہی، 8 ہلاک، درجنوں لاپتہ
اتراکھنڈ میں مسلسل بارشوں نے بڑے پیمانے پر تباہی مچادی ہے۔ جمعرات کی رات اور جمعہ کی صبح مختلف اضلاع میں کلاؤڈ برسٹ کے واقعات پیش آئے جن میں کم از کم آٹھ افراد جان سے ہاتھ دھو بیٹھے جبکہ درجنوں افراد لاپتہ ہیں۔ سب سے زیادہ نقصان چمولی، رودر پریاگ، تیھری اور باگیسور اضلاع میں ہوا، جہاں مکانات بہہ گئے، سڑکیں ٹوٹ گئیں اور مویشی ملبے تلے دب گئے۔
چمولی کے دیوال بلاک میں تارا سنگھ اور ان کی اہلیہ لاپتہ ہیں، جبکہ دو دیگر زخمی ہوئے۔ ان کے مکان اور گائے بھینسوں کے باڑے ملبے میں دب گئے، جس سے درجنوں مویشی ہلاک ہو گئے۔ باگیسور میں بھی گھروں کے بہہ جانے سے کئی افراد لاپتہ ہیں۔ ایس ڈی آر ایف، پولیس اور این ڈی آر ایف کی ٹیمیں ریسکیو آپریشن میں مصروف ہیں۔
رودر پریاگ کے علاقے جکھولی میں بھی ایک خاتون جاں بحق ہوئی جبکہ تیھری کے بھلنگنا بلاک میں کھیتوں اور انفراسٹرکچر کو بھاری نقصان پہنچا ہے۔ کئی دیہاتوں میں پینے کے پانی کی لائنیں اور بجلی کا نظام متاثر ہوا ہے۔
یہ سلسلہ وار قدرتی آفات ایک بار پھر اتراکھنڈ میں مون سون کے دوران انسانی جانوں اور جائیداد کے بڑے نقصان کی عکاسی کرتی ہیں۔
