حیدرآباد کے عوام نے مکمل چاند گرہن کا دلکش منظر دیکھا

حیدرآباد: اتوار کی شب شہر کے عوام نے آسمان پر مکمل چاند گرہن کا شاندار منظر دیکھا جو تقریباً تین گھنٹے جاری رہا۔ لوگ بڑی تعداد میں گھروں کی چھتوں، پارکوں اور کھلی جگہوں پر جامہ ہوئے تاکہ اس نایاب فلکیاتی منظر کو قریب سے دیکھ سکیں۔

آئی آئی ٹی حیدرآباد میں رات ساڑھے دس بجے خصوصی سائنسی سیشن منعقد کیا گیا جس میں تقریباً 200 طلبہ نے حصہ لیا۔ طلبہ کے لئے یہ ایک نایاب موقع تھا کہ وہ فلکیات کو براہِ راست اپنی آنکھوں سے دیکھ سکیں اور کتابی علم کو عملی تجربے سے جوڑ سکیں۔

اسی دوران اسٹارڈسٹ ایسٹرونومی کلب نے درگم چیرو کے قریب عوامی مشاہدے کا انتظام کیا۔ کلب کے صدر وینو گوپال نے طاقتور دوربین نصب کی جس کے ذریعے تقریباً 300 افراد نے گرہن کا قریب سے مشاہدہ کیا۔ ان کا کہنا تھا کہ ایسے پروگرام فلکیات کو کلاس روم سے نکال کر براہِ راست عوام کے قریب لے آتے ہیں۔

شہریوں نے بھی اپنے جذبات کا اظہار کیا۔ مادھاپور کی سافٹ ویئر انجینئر انوشا آر نے کہا کہ وہ اپنے دوستوں کے ساتھ یہ منظر دیکھنے آئیں تاکہ انہیں "ایسا آسمان دکھا سکیں جسے وہ کبھی نہ بھولیں”۔ انہوں نے مزید کہا کہ فلکیات کے شوق کی وجہ سے یہ لمحہ ان کے لئے یادگار بن گیا۔

سکندرآباد کے کالج طالب علم روی کمار نے اپنے ڈی ایس ایل آر کیمرہ سے گرہن کے حسین مناظر قید کئے۔ ان کا کہنا تھا کہ یہ لمحہ فوٹوگرافی اور فلکیات کے شوق کو یکجا کرنے کا بہترین موقع تھا۔

واضح رہے کہ "بلڈ مون” اس وقت ظاہر ہوتا ہے جب زمین کا سایہ مکمل گرہن کے دوران چاند پر پڑتا ہے اور وہ سرخی مائل دکھائی دیتا ہے۔