مستقبل کا انقلابی منصوبہ حیدرآباد میں "بھارت فیوچر سٹی” 765 مربع کلومیٹر پر قائم ہوگی

تلنگانہ حکومت نے "بھارت فیوچر سٹی” کے منصوبے کا اعلان کیا ہے جو حیدرآباد کے جنوبی حصے میں 765 مربع کلومیٹر پر پھیلا ہوگا۔ یہ منصوبہ وزیر اعلیٰ اے ریونت ریڈی کی نگرانی میں فیوچر سٹی ڈیولپمنٹ اتھارٹی کے ذریعے تیار کیا جا رہا ہے۔

حکومتی حکام کے مطابق، یہ منصوبہ تلنگانہ اسٹیٹ انڈسٹریل انفراسٹرکچر کارپوریشن کے ذریعے بین الاقوامی کنسلٹنسی کی مدد سے ماسٹر پلان کے تحت نافذ کیا جا رہا ہے۔ اس شہر کو ایک ماڈل کے طور پر تیار کیا جا رہا ہے جو پائیدار اور شمولیتی ترقی کی علامت ہوگا۔

منصوبے میں مختلف زون قائم کیے جائیں گے جن میں مصنوعی ذہانت، لائف سائنسز، الیکٹرانکس مینوفیکچرنگ، برقی گاڑیاں، توانائی ذخیرہ، سیاحت، تفریح، فلم پروڈکشن، صحت اور تعلیم شامل ہوں گے۔ حکومت کے مطابق یہ ملک کا پہلا "نیٹ زیرو اسمارٹ انڈسٹریل سٹی” ہوگا جو دس لاکھ سے زائد افراد کو رہائش، روزگار اور جدید سہولیات فراہم کرے گا۔

شہر کو "لائیو، لرن، ورک، پلے” کے تصور کے تحت ڈیزائن کیا گیا ہے، جس میں واک ٹو ورک رہائشی کلسٹرز، ہوٹل، ریزورٹس اور سیاحتی سہولتیں شامل ہوں گی۔ بہتر کنیکٹیویٹی کے لیے اندرونی میٹرو لائن اور بس ریپڈ ٹرانزٹ سسٹم بنایا جائے گا۔

اس منصوبے میں عالمی اداروں جیسے جائیکا، ورلڈ بینک اور اے آئی آئی بی کی سرمایہ کاری متوقع ہے۔ فیوچر سٹی ڈیولپمنٹ اتھارٹی کی حدود میں آؤٹر رنگ روڈ، سری سلم ہائی وے اور ناگرجنا ساگر ہائی وے کے اطراف کی زمین شامل ہے، جبکہ راجیو گاندھی انٹرنیشنل ایئرپورٹ سے براہِ راست رسائی فراہم کی جائے گی۔