60 سال بعد عثمان ساگر کے تمام 15 فلڈ گیٹس کھول دیے گئے، کئی علاقے زیرِ آب

مسلسل بارشوں اور بھاری پانی کے بہاؤ کے باعث تقریباً 60 برس بعد عثمان ساگر کے تمام 15 فلڈ گیٹس کھول دیے گئے۔ اس فیصلے کے نتیجے میں نشیبی علاقوں میں سیلابی صورتحال پیدا ہوگئی۔

حیدرآباد میٹرو واٹر سپلائی اینڈ سیوریج بورڈ کے حکام کے مطابق پچھلے چند مہینوں میں ہی پانچ مرتبہ فلڈ وارننگ جاری کی گئی تھی، جو کہ غیر معمولی صورتحال ہے۔ ابتدا میں چند گیٹس کھولے گئے لیکن بعد ازاں پانی کے بہاؤ میں تیزی آنے پر تمام فلڈ گیٹس کھولنے پڑے۔

حکام کے مطابق جمعہ کی صبح تک عثمان ساگر میں پانی کا بہاؤ 3,000 کیوسک تھا، جو شام تک بڑھ کر 8,500 کیوسک ہوگیا۔ ہفتہ کی صبح 5 بجے تک بہاؤ 12,600 کیوسک تک پہنچ گیا جس کے بعد تمام 15 گیٹس کھولنے کے سوا کوئی چارہ نہ رہا۔

اسی دوران حمایت ساگر میں بھی پانی کا دباؤ بڑھ گیا، جہاں 17 میں سے 9 فلڈ گیٹس کھول دیے گئے۔

موجودہ صورتحال (شام 6 بجے تک):

• عثمان ساگر: موجودہ سطح 1788.55 فٹ، بہاؤ 9,000 کیوسک، اخراج 9,284 کیوسک
• حمایت ساگر: موجودہ سطح 1762.55 فٹ، بہاؤ 7,000 کیوسک، اخراج 6,420 کیوسک

"محکمہ آبی وسائل نے شہریوں سے اپیل کی ہے کہ وہ محتاط رہیں اور نشیبی علاقوں میں جانے سے گریز کریں۔”