بی آر ایس کا کانگریس حکومت کے خلاف ریاست گیر احتجاج کا اعلان
بی آر ایس کے ورکنگ صدر کے ٹی راما راؤ نے اعلان کیا ہے کہ ان کی جماعت تلنگانہ میں کانگریس حکومت کی مبینہ بدعنوانی، فریب اور ناکامیوں کے خلاف بڑے پیمانے پر عوامی احتجاج کا آغاز کرے گی۔
انہوں نے کہا کہ کانگریس حکومت نے کسانوں، نوجوانوں اور عام عوام سے جو وعدے کیے تھے، وہ پورے نہیں کیے۔ اس ناکام حکومت نے ریاست کو دو دہائیوں پیچھے دھکیل دیا ہے۔
کے ٹی راما راؤ نے منگل کے روز سابقہ ورنگل ضلع کے بی آر ایس قائدین کے اجلاس سے خطاب کرتے ہوئے کہا کہ ورنگل جلسہ کانگریس حکومت کے خاتمے کی شروعات ہے۔ انہوں نے پارٹی کارکنوں سے اپیل کی کہ وہ گاؤں گاؤں جا کر عوام کو کانگریس کی ناکامیوں اور جھوٹے وعدوں سے آگاہ کریں۔
انہوں نے کہا کہ جلد ہی بی آر ایس ریاست بھر میں کسانوں کی خودکشیاں، فصلوں کا نقصان، ریتو بھروسہ کی تاخیر، دھان کی خریداری میں بے قاعدگیاں، نوکریوں کے اعلانات اور تقرریوں میں دھاندلی جیسے مسائل پر احتجاجی تحریک شروع کرے گی۔
کے ٹی راما راؤ نے الزام لگایا کہ یہ حکومت ناتجربہ کاری، لالچ، بدعنوانی اور نااہلی کا خطرناک امتزاج ہے۔ انہوں نے کہا کہ عوام کے غصے کو نظر انداز نہیں کیا جا سکتا اور بی آر ایس ہی تلنگانہ کے مفادات کی واحد محافظ ہے۔
انہوں نے ایلکتورتی جلسہ کو تلنگانہ کی سیاسی تاریخ کا ایک بڑا جلسہ قرار دیا اور کہا کہ اس نے ثابت کر دیا کہ بی آر ایس آج بھی عوام کے دلوں میں زندہ ہے۔
