تلنگانہ سرمایہ کاری میں سرفہرست، 3 لاکھ کروڑ کا ریکارڈ: ریونت ریڈی
وزیر اعلیٰ اے ریونت ریڈی نے اعلان کیا کہ تلنگانہ نے دسمبر 2023 سے اب تک تین لاکھ کروڑ روپے سے زائد ملکی و غیر ملکی سرمایہ کاری حاصل کر کے ملک کی سر فہرست ریاست کا درجہ حاصل کر لیا ہے۔ صرف اس سال ایک لاکھ کروڑ روپے کی سرمایہ کاری آئی ہے۔
تلنگانہ ریاست سرمایہ کاری، مہنگائی پر قابو، ٹیکس وصولی، روزگار کی تخلیق، پالیسی سازی اور امن و امان کے معاملے میں ملک بھر میں پہلے نمبر پر ہے۔ انہوں نے کہا کہ ریاست میں 66 لاکھ خواتین کو خود کفیل بنانے کے لیے سیلف ہیلپ گروپس کے ذریعے سب سے بڑا فنڈنگ اور مانیٹرنگ پروگرام چلایا جا رہا ہے۔
ریونت ریڈی نے بتایا کہ انہوں نے سوئٹزرلینڈ کے ڈاووس میں عالمی اقتصادی فورم، امریکہ، جنوبی کوریا، جاپان اور سنگاپور میں سرمایہ کاروں سے ملاقاتیں کر کے دنیا کو یہ باور کرایا ہے کہ "تلنگانہ مطلب بزنس”۔
انہوں نے کہا کہ ریاست میں ڈرائی پورٹ تعمیر کیا جا رہا ہے جسے آندھرا پردیش کے سمندری بندرگاہوں سے ریلوے اور سڑکوں کے ذریعے جوڑا جائے گا۔ "ہم حیدرآباد میں مستقبل شہر (فیوچر سٹی) تعمیر کر رہے ہیں، جس میں اے آئی سٹی بھی شامل ہوگا، اور ینگ انڈیا اسکلز یونیورسٹی و ینگ انڈیا اسپورٹس یونیورسٹی بھی قائم کی جا رہی ہیں،”
وزیر صنعت ڈی سریدھر بابو نے کہا کہ مائیکروسافٹ جیسی کمپنیاں اے آئی سٹی میں دلچسپی لے رہی ہیں۔ جون-جولائی تک حکومت ایک اے آئی یونیورسٹی بھی قائم کرے گی تاکہ ہنر مندی اور دوبارہ تربیت کے مواقع فراہم کیے جا سکیں۔
سوناتا سافٹ ویئر کے سی ای او سمی دھیر نے کہا کہ ان کی کمپنی آئندہ تین سے پانچ سال میں حیدرآباد میں پانچ ہزار ٹیک ماہرین کو روزگار دے گی۔
