پہلگام سانحہ: بی آر ایس کا اظہارِ غم، انصاف کی پکار

جموں و کشمیر کے پہلگام میں پیش آئے خوفناک دہشتگرد حملے پر بھارت راشٹرا سمیتی (بی آر ایس) کے اہم رہنماؤں نے شدید دکھ اور غم کا اظہار کرتے ہوئے اسے بزدلانہ اور ظالمانہ حرکت قرار دیا ہے۔

پارٹی کے ورکنگ صدر کے ٹی راما راؤ، سینئر رکن اسمبلی ہریش راؤ اور قانون ساز کونسل کی رکن کے کویتا نے الگ الگ بیانات میں اس واقعے کی شدید مذمت کی۔ حملے میں 26 معصوم جانیں ضائع ہوئیں جبکہ متعدد افراد زخمی ہوئے۔

کے ٹی راما راؤ نے اپنے بیان میں متاثرہ خاندانوں سے دلی ہمدردی کا اظہار کرتے ہوئے کہا کہ اس بزدلانہ حملے نے پورے ملک کو غم میں مبتلا کر دیا ہے۔ انہوں نے مرکز سے مطالبہ کیا کہ متاثرین کے خاندانوں کو انصاف فراہم کیا جائے اور مجرموں کو سخت سزا دی جائے۔

سابق وزیر ہریش راؤ نے بھی اس واقعے کو درندگی کی انتہا قرار دیتے ہوئے کہا کہ بی آر ایس دہشتگردی کے خلاف متحد ہے۔ انہوں نے زخمیوں کی جلد صحتیابی کی دعا کی اور جاں بحق افراد کے لواحقین سے تعزیت کی۔

کے کویتا نے بے گناہ سیاحوں پر حملے کو غیر انسانی اور ظالمانہ قرار دیا۔ انہوں نے کہا کہ اس قسم کے حملے انسانیت کو شرمندہ کرتے ہیں۔

بی آر ایس رہنماؤں نے مرکزی حکومت سے مطالبہ کیا کہ اس واقعے کے پس پشت عناصر کو کیفر کردار تک پہنچایا جائے اور متاثرین کی بھرپور مدد کی جائے۔