بھارت کا نیا فضائی ڈھال ’’سدرشن چکر‘‘: ڈرونز اور ہائپرسونک حملوں کا جواب
بھارت نے اگلی نسل کا ایک جامع فضائی دفاعی نظام تیار کرنے کا اعلان کیا ہے جس کا نام ’’سدرشن چکر‘‘ رکھا گیا ہے۔ یہ نظام مستقبل کی جنگوں میں بھارت کی فضائی حدود کو محفوظ بنانے کے لیے تیار کیا جا رہا ہے۔
ایئر مارشل اشوتوش دکشت کے مطابق یہ نظام ’’تمام فضائی دفاعی نظاموں کی ماں‘‘ ثابت ہوگا، جس میں مصنوعی ذہانت اے آئی ، کاؤنٹر ڈرون ٹیکنالوجی اور کاؤنٹر ہائپرسونک ہتھیاروں کو ایک ساتھ مربوط کیا جائے گا۔
یہ منصوبہ وزیر اعظم نریندر مودی کی جانب سے یومِ آزادی کی تقریر میں اعلان کے بعد شروع ہوا، اور اسے دس سالہ حکمت عملی کے تحت اسرائیل کے آئرن ڈوم کی طرز پر بھارت کا طاقتور ترین دفاعی ڈھال بنایا جائے گا۔
دکشت نے کہا کہ دنیا میں حالیہ جنگوں جیسے روس-یوکرین تنازعہ نے ثابت کیا ہے کہ کم قیمت ڈرونز بھی مہنگے دفاعی نظاموں کو نقصان پہنچا سکتے ہیں، اس لیے بھارت کو ہمیشہ دو قدم آگے سوچنا ہوگا۔ انہوں نے آپریشن سندور کی مثال بھی دی جہاں بھارت نے کامیابی سے جدید ڈرونز کو ناکام بنایا۔
ماہرین کا کہنا ہے کہ ’’سدرشن چکر‘‘ بھارت کے دفاعی ڈھانچے کو نئی بلندیوں تک لے جائے گا اور اسے نہ صرف ڈھال بلکہ ایک ہتھیار بھی بنائے گا۔
