مودی کا ٹرمپ کو شکریہ، بھارت-امریکہ تعلقات نئی بلندیوں کی طرف
وزیراعظم نریندر مودی نے امریکی صدر ڈونلڈ ٹرمپ کا فون کال اور 75ویں سالگرہ کی مبارکباد پر شکریہ ادا کرتے ہوئے دونوں ملکوں کے درمیان اسٹریٹجک اور تجارتی تعلقات کو مزید مضبوط بنانے کے عزم کا اعادہ کیا۔
مودی نے اپنے سوشل میڈیا پیغام میں ٹرمپ کو "دوست” قرار دیتے ہوئے کہا کہ بھارت، امریکہ کے ساتھ جامع شراکت داری کو نئی بلندیوں تک لے جانے کے لیے پرعزم ہے۔ انہوں نے یوکرین تنازع کے پرامن حل کے لیے ٹرمپ کی کوششوں کی بھی حمایت کی۔
یہ پیش رفت اس وقت سامنے آئی جب امریکی تجارتی نمائندے برینڈن لنچ نے نئی دہلی میں بھارتی حکام کے ساتھ تجارتی مذاکرات کیے۔ وزارتِ تجارت کے مطابق ملاقات میں بھارت-امریکہ تجارتی معاہدے کو جلد مکمل کرنے پر گفتگو ہوئی۔
ذرائع کے مطابق بات چیت مثبت اور تعمیری رہی، تاہم امریکی جانب سے زرعی اور ڈیری سیکٹر تک رسائی کا مطالبہ تشویش کا باعث ہے۔ امریکہ نے حالیہ مہینوں میں بھارتی اشیاء پر 50 فیصد تک ٹیرف عائد کیا تھا، جس سے مذاکرات مزید پیچیدہ ہو گئے ہیں۔
مودی نے اشارہ دیا کہ وہ براہِ راست صدر ٹرمپ سے بھی بات کرنے کے خواہشمند ہیں تاکہ دونوں ممالک کے عوام کے لیے خوشحال مستقبل کی راہ ہموار ہو۔
