ہماچل پردیش کے ضلع بلاسپور میں بادل پھٹ گیا، 10 گاڑیاں ملبے تلے دب گئیں

ہماچل پردیش کے ضلع بلاسپور کے ناحول علاقے میں ہفتہ کی صبح تقریباً تین بجے بادل پھٹنے کے باعث اچانک سیلاب آیا، جس سے 10 گاڑیاں ملبے تلے دب گئیں اور کھڑی فصلوں کو بھاری نقصان پہنچا۔ خوش قسمتی سے کسی جانی نقصان کی اطلاع نہیں ملی۔

ضلعی ڈپٹی کمشنر راہول کمار کے مطابق چار گاڑیاں مکمل طور پر ملبے میں دب گئیں جبکہ کھیتوں کو شدید نقصان پہنچا ہے۔ نقصان کا جائزہ لینے کے بعد متاثرہ کسانوں کو معاوضہ فراہم کیا جائے گا۔ پی ڈبلیو ڈی نے فوری طور پر ملبہ ہٹانے کا کام شروع کر دیا ہے تاکہ ٹریفک بحال ہوسکے۔

اس واقعے کی اطلاع ملتے ہی انتظامیہ موقع پر پہنچ گئی اور حالات کا جائزہ لیا۔ ادھر ضلع چمبا کے بھٹیات اسمبلی حلقے کے کملاری اور گھٹاسنی دیہات میں بھی پانی اور ملبے سے چھ سے زائد گھروں کو نقصان پہنچا ہے۔

ریاست کے دیگر حصوں میں بارش کا سلسلہ جاری ہے۔ محکمہ موسمیات نے ہفتہ اور اتوار کو ریاست کے بعض علاقوں میں شدید بارش کی یلو وارننگ جاری کی ہے۔

شملہ میں کہر کے باعث حدِ نگاہ چند میٹر تک محدود ہوگئی، جس سے ٹریفک متاثر ہوا۔ گزشتہ 24 گھنٹوں میں پالامپور میں 86 ملی میٹر، مراری دیوی میں 69.2 ملی میٹر اور کنگرا میں 58.2 ملی میٹر بارش ریکارڈ کی گئی۔

ریاست بھر میں بارش اور بھوسکھلن کے باعث 561 سڑکیں بند ہو چکی ہیں، 237 بجلی کے ٹرانسفارمر اور 317 پانی کی اسکیمیں بھی متاثر ہوئی ہیں۔

سرکاری اعداد و شمار کے مطابق 20 جون سے مانسون کے آغاز کے بعد اب تک بارش اور حادثات کے نتیجے میں 394 افراد جاں بحق ہوچکے ہیں جبکہ 41 افراد لاپتہ ہیں۔ ریاست کو اب تک تقریباً 4,467 کروڑ روپے کا نقصان ہو چکا ہے۔