چارلی کرک قتل: ایف بی آئی نے مشتبہ شخص کی نئی سی سی ٹی وی ویڈیو جاری کر دی
امریکہ کی معروف قدامت پسند سیاسی شخصیت اور سابق صدر ڈونلڈ ٹرمپ کے قریبی ساتھی چارلی کرک کو یوٹاہ کی ایک یونیورسٹی تقریب کے دوران فائرنگ کر کے قتل کر دیا گیا۔ صدر ٹرمپ نے اس واقعے کی تصدیق کرتے ہوئے اسے "افسوسناک اور سیاسی تشدد” قرار دیا اور یقین دہانی کرائی کہ ذمہ داروں کو سخت سزا دی جائے گی۔
ٹرمپ نے اپنے بیان میں کہا کہ "میری انتظامیہ ہر اس شخص کو انجام تک پہنچائے گی جو اس المناک واقعے یا کسی بھی سیاسی تشدد میں ملوث ہے، چاہے وہ تنظیمیں ہوں یا افراد جو عدلیہ اور قانون نافذ کرنے والے اداروں کو نشانہ بناتے ہیں۔”
ایف بی آئی کے ڈائریکٹر نے بتایا کہ پہلے حراست میں لیا گیا ایک مشتبہ شخص رہا کر دیا گیا ہے، تاہم تفتیش میں تیزی لائی جا رہی ہے۔ ادارے نے ایک سی سی ٹی وی ویڈیو جاری کی ہے جس میں مشتبہ شخص کو چھت سے کود کر فرار ہوتے دیکھا جا سکتا ہے۔ جائے وقوعہ سے جوتوں کے نشانات، بازو اور ہتھیلی کے نشانات بھی ملے ہیں جبکہ ہتھیار اور گولیاں یونیورسٹی کے قریب جنگل سے برآمد ہوئی ہیں۔
صدر ٹرمپ نے مزید کہا کہ "تحقیقات میں بڑی پیش رفت ہو رہی ہے اور جلد ملزم کو انصاف کے کٹہرے میں لایا جائے گا۔”
