مودی اور فن لینڈ کے صدر کا رابطہ، یوکرین امن و ٹیکنالوجی تعاون پر بات

بھارتی وزیرِاعظم نریندر مودی نے بدھ کے روز فن لینڈ کے صدر الیگزینڈر اسٹب سے ٹیلیفونک گفتگو کی، جس میں دونوں رہنماؤں نے دوطرفہ تعلقات کو مضبوط بنانے اور عالمی مسائل پر تبادلہ خیال کیا۔

وزیرِاعظم مودی نے اس گفتگو کو "اچھی بات چیت” قرار دیا اور کہا کہ فن لینڈ یورپی یونین میں بھارت کا اہم شراکت دار ہے۔ بات چیت میں تجارت، ابھرتی ہوئی ٹیکنالوجیز اور پائیداری کے میدان میں تعاون کا جائزہ لیا گیا۔ دونوں رہنماؤں نے کوانٹم کمپیوٹنگ، 6جی ٹیلی کام، مصنوعی ذہانت اور سائبر سکیورٹی جیسے شعبوں میں شراکت داری کو تیز کرنے پر اتفاق کیا۔

صدر اسٹب نے بھارت-یورپی یونین آزاد تجارتی معاہدے کی جلد تکمیل کی حمایت کی اور بھارت میں 2026 کے مجوزہ مصنوعی ذہانت کے عالمی اجلاس میں شرکت کی خواہش ظاہر کی۔ انہوں نے یوکرین جنگ پر بھی بریفنگ دی اور کہا کہ یورپ اور امریکہ کے رہنماؤں کے ساتھ مذاکرات جاری ہیں۔

وزیرِاعظم مودی نے ایک بار پھر اس مؤقف کو دہرایا کہ یوکرین تنازعہ صرف مذاکرات اور سفارت کاری سے ہی حل ہوسکتا ہے۔ انہوں نے فن لینڈ کے صدر کو بھارت کے دورے کی دعوت بھی دی۔

اس رابطے کو ماہرین بھارت اور فن لینڈ کے تعلقات کو نئی بلندیوں تک لے جانے کی کوشش قرار دے رہے ہیں، خاص طور پر ٹیکنالوجی، ماحولیات اور تعلیم کے شعبوں میں۔