اتراکھنڈ کے چمولی میں بادل پھٹنے کا قہر، متعدد افراد لاپتہ

اتراکھنڈ کے ضلع چمولی کے تھرالی علاقے میں جمعہ کی رات بادل پھٹنے کے باعث شدید تباہی ہوئی۔ مٹی اور ملبے کے بہاؤ سے کئی گھروں، دکانوں اور سرکاری عمارتوں کو نقصان پہنچا جبکہ متعدد افراد لاپتہ ہونے کی اطلاعات ہیں۔ ملبہ اتنا زیادہ تھا کہ تحصیل کمپلیکس اور سب ڈویژنل مجسٹریٹ کی سرکاری رہائش گاہ بھی دب گئی۔

ساگوارا گاؤں میں ایک لڑکی ملبے تلے دب جانے کی خبر سے مقامی لوگوں میں خوف و ہراس پھیل گیا۔ کئی رہائشی علاقوں کو خالی کرایا گیا اور متاثرہ افراد کو محفوظ مقامات پر منتقل کیا گیا۔ تھرالی–گوالدام اور تھرالی–ساگوارا سڑکوں پر آمدورفت معطل ہو گئی ہے جس سے مقامی لوگوں کو سخت مشکلات کا سامنا ہے۔

این ڈی آر ایف اور ایس ڈی آر ایف کی ٹیمیں رات سے ہی موقع پر پہنچ کر ریسکیو آپریشن کر رہی ہیں۔ انتظامیہ نے ریلیف کیمپ بھی قائم کر دیے ہیں۔ وزیراعلیٰ پشکر سنگھ دھامی نے کہا ہے کہ وہ ذاتی طور پر صورتحال پر نظر رکھے ہوئے ہیں اور ہر ممکن مدد فراہم کی جائے گی۔

محکمہ موسمیات نے 25 اگست تک اتراکھنڈ کے مختلف اضلاع میں بھاری بارش اور بادل پھٹنے کا الرٹ جاری کیا ہے، جس کے باعث مزید خطرات کی پیشگوئی کی جا رہی ہے۔