حیدرآباد کی سڑکوں پر نیا انتظام 50 پیٹرولنگ بائیکس اور 100 مارشلز ڈیوٹی پر

حیدرآباد ٹریفک پولیس نے شہر میں ٹریفک نظام کو مزید مؤثر بنانے کے لئے 50 نئی پیٹرولنگ بائیکس اور 100 ٹریفک مارشل تعینات کیے ہیں۔ اس اقدام کا مقصد شہریوں کو بہتر سفری سہولت فراہم کرنا اور ٹریفک کی روانی میں اضافہ کرنا ہے۔

پولیس کے مطابق موجودہ اوسط رفتار جو 18 کلومیٹر فی گھنٹہ ہے، اسے 23 کلومیٹر فی گھنٹہ تک بڑھانے کی کوشش کی جا رہی ہے۔ آئندہ مرحلے میں مارشلز کی تعداد 100 سے بڑھا کر 500 تک کی جائے گی تاکہ بڑے پیمانے پر ٹریفک کنٹرول میں بہتری آئے۔

ہر پیٹرولنگ بائیک جدید سہولیات سے لیس ہے جن میں عوامی اعلانات کے لئے مائیک سسٹم، وائرلیس سیٹ، ایل ای ڈی بیٹن، ڈیش بورڈ کیمرہ، اور جی پی ایس ٹریکنگ شامل ہیں تاکہ ٹریفک قوانین کی خلاف ورزیوں پر فوری کارروائی کی جا سکے۔ اس کے علاوہ بائیک پر فرسٹ ایڈ کٹ، وہیل کلیمپ کیریئر برائے "نو پارکنگ”، ریفلیکٹیو جیکٹ، رین کوٹ، ٹریفک کنٹرول کا سامان، ٹیبلٹ ڈیوائس اور باڈی کیمرہ بھی فراہم کیا گیا ہے تاکہ شواہد محفوظ کیے جا سکیں۔

پولیس کمشنر سی وی آنند کے مطابق یہ اقدامات شہریوں کو بہتر سفری تجربہ فراہم کرنے کے ساتھ ساتھ حادثات اور ٹریفک جام کو کم کرنے میں بھی معاون ثابت ہوں گے۔