انٹیگریٹڈ سب رجسٹرار آفس کا سنگ بنیاد، ریونت ریڈی کا 8 ماہ میں سہولیات دینے کا وعدہ

حیدرآباد میں وزیر اعلیٰ ریونت ریڈی نے گچی باؤلی میں انٹیگریٹڈ سب رجسٹرار آفس کی تعمیر کا سنگ بنیاد رکھا۔ یہ منصوبہ اپرنا کنسٹرکشن کی جانب سے سماجی ذمہ داری کے بجٹ کے تحت 30 کروڑ روپے کی لاگت سے مکمل کیا جائے گا۔

اس موقع پر ریونت ریڈی نے حیدرآباد کی تاریخی اہمیت کو اجاگر کرتے ہوئے نظام نوابوں اور سابق وزرائے اعلیٰ کی خدمات کو یاد کیا۔ انہوں نے یاد دلایا کہ مدھاپور، کنڈاپور اور وٹی ناگولاپلی کی ترقی میں وائی ایس راج شیکھر ریڈی کا بڑا کردار رہا، جبکہ پی وی نرسمہا راؤ نے خصوصی اکنامک زون قائم کیا۔ ریونت ریڈی نے کہا کہ ہائی ٹیک سٹی کی بنیاد ندروملی جاناردھن ریڈی کے دور میں رکھی گئی تھی۔

انہوں نے شہر میں حالیہ بارشوں سے پیدا ہونے والی سیلابی صورتحال پر تشویش کا اظہار کیا اور کہا کہ معمولی بارش بھی حیدرآباد کو ڈبونے کے خطرے میں ڈال دیتی ہے۔ اس موقع پر انہوں نے موسی ندی کی صفائی اور جدید ترقی کی ضرورت پر زور دیتے ہوئے کہا کہ اگر ہم نیو یارک اور ٹوکیو جیسے شہروں سے مقابلہ کرنا چاہتے ہیں تو موسی ندی کو نائٹ اکنامی کا مرکز بنانا ہوگا۔

وزیر اعلیٰ نے کہا کہ رجسٹریشن ڈیپارٹمنٹ ریاست کی آمدنی کا بڑا ذریعہ ہے اور عوام کو سرمایہ کاروں کو مجرم کی طرح نہیں دیکھنا چاہیے۔ انہوں نے اعلان کیا کہ آٹھ ماہ کے اندر نیا سب رجسٹرار آفس مکمل طور پر فعال ہوگا اور عوام کو جدید سہولیات فراہم کرے گا۔ ریونت ریڈی نے یقین دہانی کرائی کہ 2 جون تک گیارہ انٹیگریٹڈ دفاتر کام کرنا شروع کر دیں گے۔