ہندوستان کا دوسرا خلا باز شوبھانشو شکلا دہلی پہنچ گئے

خلائی تاریخ رقم کرنے والے گروپ کیپٹن شبھانشو شکلا دہلی واپس لوٹ آئے۔ وہ خلا میں جانے والے دوسرے اور انٹرنیشنل اسپیس اسٹیشن جانے والے پہلے بھارتی ہیں۔

شکلا 15 جولائی کو امریکی ریاست کیلیفورنیا کے ساحل کے قریب زمین پر اترے اور اتوار کی صبح دہلی پہنچے۔ ایئرپورٹ پر ان کا استقبال ان کے اہل خانہ، وفاقی وزیر سائنس و ٹیکنالوجی جتیندر سنگھ، دہلی کی وزیراعلیٰ ریکھا گپتا اور بڑی تعداد میں موجود عوام نے کیا جو ترنگا لہرا رہے تھے۔

شبھانشو شکلا نے ’’ایکسیم۔4‘‘ مشن میں پائلٹ کی حیثیت سے 25 جون کو فلوریڈا کے کینیڈی اسپیس سینٹر سے اڑان بھری اور اگلے روز انٹرنیشنل اسپیس اسٹیشن سے جُڑ گئے۔ وہ ایک سال سے امریکہ میں ناسا، ایکسیم اور اسپیس ایکس کے مراکز پر تربیت حاصل کر رہے تھے۔ ان کا یہ قیمتی تجربہ بھارت کے مستقبل کے انسانی خلائی منصوبوں، جیسے 2027 میں ’’گگنیان‘‘، 2035 میں ’’بھارتیہ انترکش اسٹیشن‘‘ اور 2040 میں چاند پر انسانی مشن، کے لیے انتہائی اہم سمجھا جا رہا ہے۔

وزیراعظم نریندر مودی نے یومِ آزادی کے خطاب میں شکلا کا ذکر کیا اور کہا کہ ان کی یہ کامیابی بھارت کے لیے فخر کا باعث ہے۔ توقع ہے کہ وہ جلد وزیراعظم سے ملاقات کریں گے اور اپنے تجربات قوم کے ساتھ شیئر کریں گے۔ پارلیمنٹ میں بھی ان کے مشن پر خصوصی بحث ہوگی تاکہ بھارت کے خلائی پروگرام کو ترقی یافتہ ملک بنانے کے سفر کا حصہ بنایا جا سکے۔