تلنگانہ میں 5 ہزار کلومیٹر سے زائد نئی سڑکوں کی تعمیر کا منصوبہ
تلنگانہ حکومت نے ریاست بھر میں جدید اور پائیدار سڑکوں کا جال بچھانے کا بڑا منصوبہ شروع کر دیا ہے۔ اس منصوبے کے تحت 5,190 کلومیٹر سڑکیں ہائبرڈ اینیوٹی ماڈل کے تحت تعمیر کی جائیں گی، جس کا مقصد ہر گاؤں کو منڈل ہیڈکوارٹر، ہر منڈل کو ضلع ہیڈکوارٹر اور ہر ضلع کو حیدرآباد سے جوڑنا ہے۔
پہلے مرحلے میں محکمہ سڑک و عمارت17 پیکجز میں 5,190 کلومیٹر سڑکیں تعمیر کرے گا، جس پر 6,478 کروڑ روپے خرچ ہوں گے، جبکہ محکمہ پنچایت راج 7,947 کلومیٹر سڑکوں پر تقریباً 6,000 کروڑ روپے کی لاگت سے کام کرے گا۔ اس کے علاوہ 6,810 کلومیٹر سڑکوں کے ٹینڈر رواں سال دسمبر تک جاری کیے جائیں گے۔
وزیر نے کہا کہ معیاری سڑکیں معاشی ترقی کی ریڑھ کی ہڈی ہیں، اور حکومت فلاح و بہبود کے ساتھ انفراسٹرکچر پر بھی یکساں توجہ دے رہی ہے۔ منصوبے کی شفافیت، بروقت ادائیگی اور آن لائن مانیٹرنگ سسٹم کی بھی یقین دہانی کرائی گئی ہے۔
