حیدرآباد میں پھر موسلا دھار بارش، نمپلی میں سب سے زیادہ 11.75 سینٹی میٹر بارش

حیدرآباد میں ہفتہ کی رات اچانک موسلا دھار بارش نے شہر بھر میں شدید صورتحال پیدا کر دی، کئی علاقوں میں پانی بھرنے سے ٹریفک نظام درہم برہم ہو گیا۔ محکمہ ترقی و منصوبہ بندی تلنگانہ کے مطابق نمپلی (بیگم بازار دودھ خانہ یو ایچ سی) میں سب سے زیادہ 11.75 سینٹی میٹر بارش ریکارڈ کی گئی، جبکہ چارمینار (سردار محل زیڈ سی آفس) میں 10.63 سینٹی میٹر بارش ہوئی۔

شہر کے کئی علاقے جیسے خیرت آباد، عاصف نگر، حیات نگر، امبرپیٹ، مشیرآباد، بہادر پورہ، سکندرآباد، بندل گوڑہ، سعید آباد، اپل اور الوال میں بھی شدید بارش ہوئی۔ دو گھنٹے کی اس موسلا دھار بارش نے پنجہ گٹہ، عامرپیٹ، ایل بی نگر، کوکٹ پلی، ایس آر نگر، میاں پور، بیگم پیٹ، لکڑی کا پل، ہائی ٹیک سٹی، مادھا پور اور مہدی پٹنم سمیت بیشتر سڑکوں پر گھٹنے تک پانی جمع کر دیا۔

اوبھرتے مین ہولز نے صورتحال مزید خراب کر دی اور شہریوں کو شدید مشکلات کا سامنا کرنا پڑا۔ اس اچانک بارش نے راکھی کے تہوار کی خوشیاں بھی متاثر کیں، کئی مقامات پر تقریبات ادھوری رہ گئیں۔