روس میں اجیت ڈوول اور پیوٹن کی ملاقات، امریکی دباؤ کے باوجود بھارت کی خودمختار

بھارت کے قومی سلامتی کے مشیر اجیت ڈوول نے روسی صدر ولادیمیر پیوٹن سے ماسکو کے کریملن میں اہم اسٹریٹجک ملاقات کی۔ یہ ملاقات ایسے وقت میں ہوئی جب امریکہ نے بھارت کی روس سے تیل کی خریداری پر ناراضگی کا اظہار کرتے ہوئے بھارتی درآمدات پر 50 فیصد ٹیرف نافذ کر دیا ہے۔

اجیت ڈوول اور پیوٹن کی بات چیت نے دونوں ممالک کے درمیان اسٹریٹجک شراکت داری کو مزید مضبوط کیا۔ ملاقات کے دوران دفاع، سلامتی، توانائی اور معاشی شعبوں میں تعاون پر زور دیا گیا، جبکہ صدر پیوٹن کے رواں سال بھارت کے دورے کی بھی تصدیق کی گئی۔

اس سے ایک روز قبل امریکی صدر ڈونلڈ ٹرمپ نے ایک نیا حکم نامہ جاری کیا جس کے تحت بھارتی مصنوعات پر اضافی 25 فیصد ٹیرف لگا دیا گیا۔ بھارت نے اس اقدام کو "غیر منصفانہ اور اقتصادی طور پر ناقابل قبول” قرار دیا ہے۔ ترجمان وزارت خارجہ رندھیر جیسوال نے کہا کہ بھارت اپنی اقتصادی خودمختاری کے تحفظ کے لیے ہر ممکن اقدام کرے گا۔

وزیراعظم نریندر مودی نے بھی ایک بین الاقوامی کانفرنس میں امریکی دباؤ کا بالواسطہ جواب دیتے ہوئے کہا کہ بھارت اپنی خارجہ پالیسی پر کسی کا دباؤ قبول نہیں کرے گا، چاہے اس کی کوئی بھی قیمت کیوں نہ ہو۔