اسپیس ایکس نے ہفتہ کی صبح کامیابی کے ساتھ اپنا فالکن 9 راکٹ فلوریڈا کے کیپ کینیورل اسپیس فورس اسٹیشن سے لانچ کیا۔ یہ مشن سیٹلائٹ SXM-10 کو خلا میں لے کر گیا، جو کہ سیریس ایکس ایم کی سیٹلائٹ ریڈیو سروس کے لیے تیار کیا گیا ہے۔
یہ سیٹلائٹ اب جیو سینکرونس ٹرانسفر آربٹ میں موجود ہے، جہاں سے یہ زمین کے گرد گردش کرتے ہوئے سیٹلائٹ ریڈیو کی سہولیات فراہم کرے گا۔ SXM-10 سیٹلائٹ کو معروف کمپنی میکسر ٹیکنالوجیز نے تیار کیا ہے۔
یہ فالکن 9 راکٹ کی آٹھویں پرواز تھی، جو اس سے قبل ناسا کے اہم مشن "کریو-9” سمیت کئی مشنز میں استعمال ہو چکی ہے۔
یہ مشن اسپیس ایکس کے لیے ایک اہم کامیابی ہے، خاص طور پر ایسے وقت میں جب کمپنی مختلف سیاسی تنازعات کا شکار ہے۔ اسپیس ایکس کے مالک ایلون مسک اور امریکی صدر کے درمیان حالیہ کشیدگی کے بعد خدشہ ظاہر کیا جا رہا ہے کہ کمپنی کے تقریباً 22 ارب ڈالر کے سرکاری معاہدے متاثر ہو سکتے ہیں۔
ایلون مسک کی جانب سے صدر کی مالی پالیسیوں پر تنقید نے تنازع کو جنم دیا، جس کے بعد دونوں شخصیات کے درمیان بیانات کا سخت تبادلہ ہوا۔ امریکی صدر نے سرکاری معاہدے ختم کرنے کی دھمکی دی، جبکہ ایلون مسک نے بھی سوشل میڈیا پر بھرپور جواب دیا۔
