بادل پھٹے، تباہی چھا گئی: اُترکھنڈ میں 4 جاں بحق، 50 لاپتا، ریسکیو آپریشن جاری

اُترکھنڈ کے ضلع اُترکاشی کے دھرالی گاؤں میں منگل کی صبح اچانک کلاؤڈ برسٹ (بادل پھٹنے) کے بعد شدید لینڈ سلائیڈنگ اور طوفانی سیلاب نے علاقے کو اپنی لپیٹ میں لے لیا۔ اب تک کی اطلاعات کے مطابق 4 افراد جاں بحق ہو چکے ہیں جبکہ 50 سے زائد افراد لاپتا ہیں۔

خوفناک مناظر میں پہاڑوں سے پانی کا تیز ریلا گھروں کو بہا لے جاتا ہوا دیکھا گیا، جس کے باعث کئی مکانات مکمل طور پر تباہ ہو گئے۔ سوشل میڈیا پر گردش کرتی ویڈیوز میں چیخ و پکار اور گھبراہٹ کے مناظر دکھائی دے رہے ہیں۔

اُترکاشی پولیس نے تباہی کی تصاویر شیئر کرتے ہوئے عوام سے دریا کے کنارے سے دور رہنے کی اپیل کی ہے۔ ریاستی وزیر اعلیٰ پشکر سنگھ دھامی نے کہا ہے کہ امدادی ٹیمیں فوری طور پر موقع پر پہنچ گئی ہیں اور بچاؤ کے کام جاری ہیں۔

وفاقی وزیر داخلہ امیت شاہ نے وزیر اعلیٰ سے رابطہ کر کے صورتحال کا جائزہ لیا۔ انہوں نے کہا کہ آئی ٹی بی پی کی تین اور این ڈی آر ایف کی چار ٹیمیں علاقے میں روانہ کر دی گئی ہیں۔ امیت شاہ نے کہا کہ "میں مسلسل حکام سے رابطے میں ہوں، اور متاثرین کی سلامتی کے لیے دعا گو ہوں۔”

ریاست بھر میں شدید بارشوں کا سلسلہ جاری ہے۔ محکمہ موسمیات نے آج کے لیے "ریڈ الرٹ” جاری کیا ہے جبکہ پورے ہفتے "ییلو الرٹ” برقرار رہے گا۔