ترقی کا اعتراف، نرنوڑ کو ملی قومی پہچان

نئی دہلی میں منعقدہ 17ویں سول سروسز ڈے کے موقع پر وزیر اعظم نریندر مودی نے "وزیر اعظم ایوارڈ برائے بہترین عوامی انتظامیہ” آدل آباد ضلع کے کلکٹر راجرشی شاہ کو پیش کیا۔ یہ اعزاز نرنوڑ منڈل کی بہترین ترقیاتی کارکردگی پر دیا گیا، جو کہ ملک بھر میں پانچ اعلیٰ کارکردگی والے بلاکس میں شامل کیا گیا۔

نرنوڑ منڈل کو ’’ایسپریشنل بلاک پروگرام‘‘ کے تحت منتخب کیا گیا، جو کہ پسماندہ علاقوں کی ترقی کو تیز کرنے کے لیے صحت، تعلیم، زراعت اور بنیادی ڈھانچے جیسے شعبوں میں بہتری پر زور دیتا ہے۔

نرنوڑ میں حاصل کی گئی اہم کامیابیوں میں ماں اور بچے کی صحت میں بہتری، سو فیصد قبل از پیدائش طبی رجسٹریشن، حاملہ خواتین کے لیے لنچ باکس اسکیم، موبائل میڈیکل یونٹس کے ذریعے صحت کیمپ، اور نوعمر لڑکیوں میں خون کی کمی کم کرنے کے لیے "گریجن پوشن متر” پروگرام شامل ہیں۔

وزیر اعلیٰ ریونت ریڈی نے آدل آباد کلکٹر راجرشی شاہ اور ضلعی انتظامیہ کو مبارکباد دیتے ہوئے نرنوڑ منڈل کو قومی سطح پر پانچ بہترین بلاکس میں شامل ہونے پر فخر کا اظہار کیا۔

ایوارڈ کے ساتھ ایک کروڑ روپے کی گرانٹ بھی دی گئی ہے، جسے نرنوڑ میں مزید ترقیاتی منصوبوں کے لیے استعمال کیا جائے گا۔ ان منصوبوں میں قبائلی میوزیم کا قیام، ڈیجیٹل کلاس رومز کی توسیع، اضافی آر او واٹر پلانٹس کی تنصیب، ٹیلی میڈیسن، اور حیض سے متعلق صحت آگاہی پروگرام شامل ہیں۔