وقف قانون پر احتجاج جاری، مرشدآباد میں مزید 12 افراد گرفتار
مرشدآباد: مغربی بنگال کے ضلع مرشدآباد میں وقف ترمیمی قانون کے خلاف پرتشدد احتجاج میں شدت آتی جا رہی ہے۔ پولیس کے مطابق اتوار کے روز مزید 12 افراد کو گرفتار کیا گیا ہے، جبکہ اب تک مجموعی طور پر 150 سے زائد افراد کو حراست میں لیا جا چکا ہے۔
جمعہ کو شروع ہونے والے احتجاج نے پورے علاقے کو اپنی لپیٹ میں لے لیا تھا، جس کے دوران کئی گاڑیوں کو نذرِ آتش کیا گیا، پولیس اہلکاروں پر پتھراؤ کیا گیا اور سڑکیں بلاک کر دی گئیں۔ ہفتہ کے روز بھی کچھ علاقوں میں تشدد کے چھوٹے واقعات رپورٹ ہوئے۔
پولیس حکام نے بتایا کہ حالات پر قابو پانے کے لیے متاثرہ علاقوں میں دفعہ 163 کے تحت پابندیاں نافذ کر دی گئی ہیں اور انٹرنیٹ خدمات بھی معطل کر دی گئی ہیں۔ اہم سڑکوں پر گاڑیوں کی چیکنگ اور حساس علاقوں میں گشت جاری ہے۔
اس دوران افسوسناک خبر یہ ہے کہ شمسیر گنج کے جعفرآباد علاقے میں ایک شخص اور اس کے بیٹے کی لاشیں ان کے گھر سے برآمد ہوئیں، جن پر چاقو کے گہرے زخم پائے گئے۔ پولیس کے مطابق ان کی شناخت ہروگوبندو داس اور چندن داس کے طور پر کی گئی ہے۔
پولیس کا کہنا ہے کہ تشدد کے واقعات کی تحقیقات جاری ہیں اور مزید گرفتاریاں متوقع ہیں۔
