کنچہ گچی باؤلی کے جنگلاتی اراضی میں 10,000 کروڑ کا اسکام: بی آر ایس
بی آر ایس (بھارتیہ راشٹریہ سمیتی) کے کارگزار صدر کے ٹی راما راؤ نے جمعہ کے روز چیف منسٹر ریونت ریڈی کی حکومت پر 10,000 کروڑ روپے کے زمین گھپلے کا سنگین الزام عائد کیا ہے۔
ان کا دعویٰ ہے کہ یہ اسکینڈل کنچہ گچی باؤلی کے قیمتی جنگلاتی اراضی کو کم قیمت پر فروخت کرنے، ماحولیاتی قوانین کی کھلی خلاف ورزی اور سیاسی-انتظامی ملی بھگت کے ذریعے انجام دیا گیا ہے۔
کے ٹی راما راؤ نے دعویٰ کیا کہ یہ معاملہ ایک بی جے پی ایم پی کے ساتھ ملی بھگت کا نتیجہ ہے، جس میں یونیورسٹی آف حیدرآباد کے قریب واقع جنگلاتی اراضی کو مالی چالاکیوں کے لیے استعمال کیا گیا۔
انہوں نے کہا کہ اس زمین کو بینکنگ نظام میں شامل کرکے اربوں روپے کی ہیرا پھیری کی گئی، جس سے نہ صرف ماحول کو نقصان پہنچا بلکہ ICICI بینک کے لیے بھی سنگین خطرہ لاحق ہو گیا ہے۔
بی آر ایس نے فوری طور پر سی بی آئی اور دیگر مرکزی ایجنسیوں سے جانچ کا مطالبہ کرتے ہوئے اس معاملے کی شفاف تحقیقات پر زور دیا ہے۔
