تہاؤر رانا سے این آئی اے کی تفتیش شروع
نیشنل انویسٹی گیشن ایجنسی نے 26/11 ممبئی حملوں کے مبینہ سازشی تہاؤر حسین رانا کو امریکہ سے کامیاب حوالگی کے بعد اپنی تحویل میں لے لیا ہے۔
جمعہ کے روز دہلی میں این آئی اے ہیڈکوارٹر میں ان کی تفتیش کا آغاز کیا گیا۔
ذرائع کے مطابق تفتیش میں رانا سے اُن کے بھارت میں قیام، یہاں ملنے والے افراد، ڈیوڈ ہیڈلی کے ساتھ تعلقات اور پاکستان کی خفیہ ایجنسی آئی ایس آئی سے روابط کے بارے میں سوالات کیے جا رہے ہیں۔
این آئی اے کا کہنا ہے کہ 2008 کے دہشتگرد حملوں کی مکمل سازش کو بے نقاب کرنے کے لیے رانا کو 18 دن کی تحویل میں رکھا جائے گا۔
یاد رہے کہ 26/11 ممبئی حملوں میں 166 افراد جاں بحق اور 238 سے زائد زخمی ہوئے تھے۔ رانا کو امریکہ میں طویل قانونی کارروائیوں کے بعد بھارت لایا گیا۔
این آئی اے نے امریکہ کی ایف بی آئی اور دیگر اداروں کے تعاون کا شکریہ ادا کیا ہے اور اسے دہشتگردوں کو عالمی سطح پر انصاف کے کٹہرے میں لانے کی بڑی کامیابی قرار دیا ہے۔
